Nongstoiñ, Naitung 21: Ka jingkular jong ka sorkar ba kan ai lad noh ïa ka jingtih dewïong ka ban pyntreikam da ka buit stad saïan jong kane ka juk, ka la ïaid la saw snem tam. Hynrei haduh mynta ym pat ïohi dak ei ei ruh em ba ka la don ka jingpyntreikam ban tih dewïong da ka buit ba thymmai.
Ha West Khasi hills ki la don ki nongkhaïi dewiong kiba la dep ïoh laisen ban tih, hynrei haduh mynta imat kitei kiba la ïoh laisen tih dewïong kim pat lah ban pynbiang lut ïa baroh ki jingdonkam namar ba ka pyrthei ka dang kynjah jar jar.
Ha kine ki sngi ba la dep katto katne ki riew rangbah haba ïakren bad u nongthohkhubor, ki la ong ba ka jingtih dewïong da ka rukom tih kaba thymmai, ka long kaba shitom haduh katta katta bad imat dei na katei ka daw ba kiba la ïoh jingbit ban tih dewiong ruh ki suki ban pyntrei.
U Bah D.Sun u la ong, “Kumba ka long ha kine ki sngi kan dang shim por slem, ba wat kito kiba la ïoh jingbit ba kin lah ban pynmih dewïong kumba pynmih da kaba tih thliew khnai kumba ju leh baroh shikatta”.
“Haba phai pat ha ka jinghiar ka ïoh ka kot, ka kamai kajih naduh ba la ka sorkar ka la khang ban tih bad shalan dewïong, na ki 11 tylli ki district hapoh ka jylla ka West Khasi Hills ka dei ka district kaba nyngkong eh kaba shah ktah na ka jingkhang tih dewïong, namar palat marshiteng na ki paitbah nongshong shnong ki dei kiba im ja kpoh da kaba leit bylla tih dewïong, nalor ki nongthep ha ki kali, ki nongñiah, ki trai kali”, u la ong.
U la bynrap ruh, “Ki don ruh shibun bah ki nongshong shnong kiba naduh ba ka sorkar ka la khang ban tih bad shalan dewïong, ki la phai noh sha ka rep ka riang kum ka rep synsar, rep sying bad kiwei kiwei. Hynrei na ka jinghiar dor palat pud jong ki mar rep ki la shu shah ha ka um dum bad ha ka kut lad”.
“Na ka liang ki paitbah nongshong shnong hapoh ka district, ki ap khmih lynti ba lano ka sorkar kan pyllait noh ïa ka jingtih dewïong kumba ka la dep kular ba kan sa pyllait noh”, la ban biang u Bah Sun.
