Sdang ka Sorkar ïa ka projek ban pyllait ïa ka Jylla na ka jingpang lamwir naba shah dait ksew

Shillong, Naitung 21 : Ka Sorkar Jylla kala sdang pyntreikam ïa ka pilot project ne ka project ba shu pyrshang ban peit ïa ka jingtreikam, ha ka Lah Sngi U Blei ban ïakhun pyrshah kumno ban ratdyngkhong ïa ka jingpang lamwir na ka jingshah dait ksew lamwir ha Laitumkhrah hapoh ka “One Health”, kaba la wanrah lang ïa ki kynhun na ka tnad ka koit ka khiah, ka Animal Husbandry bad ki Dorbar Shnong.
Kane ka project, bala lamkhmat da ka National Health Mission lyngba ka jingkyrshan ka Tnad ka Koit ka Khiah, ka Tnad Animal Husbandry bad ka CRE India Foundation, kan sdang naduh ka 22 tarik Naitung ha baroh ki kyntoit kiba don ha Laitumkhrah.
Ki Heh Ophisar ki pyntip ba ka jingthmu ka pynleit jingmut eh halor ka jingai injek ïa ki ksew, ka jingpynsngewthuh paidbah, ka jingpynkhlain ïa ka jingpeitngor ïa ka jingpang, bad ka jingdon jingkitkhlieh ki trai jong ki mrad ba ki ri khnang ba kan kynjoh ïa ka thong ka pyrthei ban nym don shuh kiba ïap na ka jingpang lamwir hapoh u 2030.
Ka matpdeng jong ka Jylla ha kane ka projek ka long “One Health, One Future-Together for a Rabies-Free Meghalaya”.
U Dr Paul N. Chyne, Director (MCH & FW) bad Joint MD, NHM, ula ong ba kane ka projek kan khmih bniah ïa ki buit treikam kum ka QR-coded collar bad digital tracking hashuwa ban pyntreikam lang ha baroh kawei ka Jylla.
U Bah David T. Sun na ka Tnad Animal Husbandry ula ban jur ïa ka jingai injek bad jingpynduh khun, katba u Director ka CRE India Harish Tiwari ula buh ïa ka thong ba 70% ka jingai injek ïa ki ksew bad pynbna ban synniang T.1 lak.
Ka kong Valerie J. Laloo, State Nodal Officer, NHM, kala pyntip ba kane ka pilot project kan ai ïa ki jinghikai na ka bynta ban pyntreikam ha baroh kawe ka Jylla.