Ka “White Revolution 2.0” na ka bynta ban shna ïa ka Amul Bengal Dairy ba heh tam ha pyrthei: Amit Shah

New Delhi, Naitung 21: Ban pynïaid shaphrang ïa ki jingangnud jong u Myntri Rangbahduh ka ri u Narendra Modi halor ka “Sahkar Se Samriddhi” bad ka thong jong ka “White Revolution 2.0”, u Myntri ka sorkar pdeng uba khmih ïa ka tnat Cooperation u Amit Shah ha ka sngi baar u la pynlong ïa ka Bhoomi Pujan na ka bynta ka jaka shna Amul Bengal Dairy kaba heh tam ha ka pyrthei kaba hab hapoh ka Amul Bengal Dairy Project ha ka jingïalang kaba la long ha New Town Convention Centre ha Kolkata.
Ha kane ka sngi u Myntri Rangbah ka West Bengal u Suvendu Adhikari, u Lamphang ka Ïingdorbar Thaw Aiñ jong ka Gujarat Legislative Assembly u Shankarbhai Chaudhary, U Myntri ka West Bengal ba khmih ia ka Cooperation u Swapan Dasgupta, u State Finance Minister u Tapas Roy, u Myntri ka Industry and Commerce u Dr Kalyan Chakraborty, Myntri ka Food Processing and Horticulture u Sharadwat Mukherjee, Chief Secretary ka West Bengal u Manoj Kumar Agrawal, Chairman ka Amul Dairy u Ashok Chaudhary, bad kiwei kiwei kiba la shah khot sngewbha bad ki nongmihkhmat na ki cooperative sector ki la don lang.
Haba kren ha kane ka jingïalang u Myntri ka sorkar pdeng bad u Myntri ka Cooperation u Amit Shah u la ong ba hadien jong ka jingjop ha ka Bengal Assembly election, u la wan na ka bynta jong u Myntri Rangbahduh ka ri u Narendra Modi ban pynthiang ïa kane ka prokram na ka bynta ki nongshong shnong jong ka Bengal da ka mishti doi. Ula ong ba ka jingkylla ka la wanrah da ki nongshong shnong jong ka Bengal ka long kaba pher bad ka khanapateng kaba ianujor bad baroh ki Assembly election ba la pynlong ha ka jylla naduh ka sngi ba ïoh ka jinglait luid.
U Amit Shah u la ong ba ka West Bengal ka la long ka jylla kaba ai mynsiem hajan baroh ki bynta jong ka jingim ha ka ri. U la ong ba lada ki phew snem ka West Bengal ka la neh kumba la ïaid shakhmat jong baroh ka ri ha ka liang ka pule puthi. Ka Bengal ka la pynmih ruh ïa uwei uba ïakhih laitluid ha ka jingïakhih laitluid ka ri.
Ha ki bynta jong ka jingngeit, ka jingaiti bad ka sankirtan, Chaitanya Mahaprabhu, Swami Vivekananda, Ramakrishna Paramahansa bad Maharshi Aurobindo ki la thaw ïa ki rukom long kiba phylla. Haba wan sha ka jinglong aiti ïalade bad ka jingminot, ka Bengal, lyngba ki nongïakhun laitluid kum u Netaji Subhas Chandra Bose bad Khudiram Bose, kum ju tieng ban aiti da kaba khraw tam na ka bynta ka ri.
U Myntri ka tnat Cooperation u la ong ba dei ha kane ka Bengal ba u Gurudev Rabindranath Tagore u la ïoh ka jingithuh ha ka pyrthei, u Acharya Jagadish Chandra Bose u la ïoh ka jinglah ban pyndep ïa ki kam saïan bad u Bankim Chandra Chattopadhyay u la ai ka jingbthah kaba thymmai halor ka cultural nationalism da kaba thaw ïa ka “Vande Mataram” ha “Anandamath”.
U Amit Shah u la ong ba mynta ka sngi ka dei ka sngi kaba kyrpang na ka bynta ki nongrep bad ki nongri jingri ka West Bengal. Ka Amul ka la leh ïa ka Bhoomi Pujan kum kawei na ka jaka shna kaba heh tam ha kane ka jylla. Ha ka phase ba nyngkong jong ka project, 10 lakh litre ka dud yn pynmih manla ka sngi, kaba ai jingmyntoi kumba 1.20 lak ngut ki nongpynmih kiba rit bad kiba ri jingri.
U Amit Shah u la ong ba kham mynshwa u la kyrpad ïa u Myntri Rangbah ka jylla ba lada ïoh artylli ki jaka ba 15 acre kawei kawei sha ka Amul, baroh kawei ka kam pynmih dud, ka jingshna bad ka ïew na ka bynta ka phang mihngi ka India kin lah ban treikam na West Bengal.