Dei u CM uba phah khynra ïa ka ‘farm house” jong nga ba u tieng ïoh nga jop: Bernard

Tura, Naitung 23 : U Bernard N Marak u la kynnoh ba u Myntri Rangbah ka jylla u Conrad K Sangma u la ktah mationg ïa u namar u la bthah ïa ki pulit ban pynïasnoh ïa ka jingjia hynnin ka sngi bad kawei ka case POCSO kaba la jia ha u Rymphang. U la ong ba balei ban pynïasnoh ïa katei ka jingjia bad ka jingwan khynra jong ki pulit hynnin ha Rimpu Bagan.
U la kynnoh ba ka jingwan khynra ha ka farm house jongu nangta ha ïing kmie jongu ka dei kaba la pynkhreh bha da ki pulit tang ban ïoh pynjah burom ïa u namar la leh khlem da ai ïaka warrant hynrei dei namar ba la bthah da u myntri rangbah namar u sheptieng ïoh u shah rem ha u ha ka election ban wan.
U la ong ka long kaei kaei kaba pynkyndit ban ïohi ba don lang u DC bad SP ha ka jingwan khynra ha ka ïing jongu hynnin ka sngi. Ha ka jingshisha ki dei ki briew jongka excise ki ban wan khynra ym dei ki pulit. Hynrei namar ba la bthah nalor kumta la ïadon lang ki heh bad nalor kata la pynkheiñ lut ïa baroh ki kyndon
“Kane ka dei ka ïing jong nga bad ka don shabar u pud ka Municipal. Hooid ka long kaba shisha ba ym don license namar nga dei u riew lum hynrei ki jingkynnoh ba la pynlong ïa ka kum ka brothel ka long ka bym shisha. Ym don uwei ruh na kiba shah kem kiba ïa donkti haki kam awria. Ki pulit ki la rung jubor bad leh tohmet ïa ki khynnah skul kiba nga pynleit skul bad nga kynnoh ba ki ruh ki don kti ha kaba ktah kti ïa ki khyllung khynnah” ong u Marak.
“Ka long kaei kaei kaba bakla ba u myntri rangbah un buh shun ïa nga bad ïa kiba haïing hasem jong nga tang namar u sngewthuh ba um jop shuh.Ki briew ki la duh jingshaniah ïa ka NPP bad khlem pep ka NPP kan rem bun tylli ki jaka ha ka jylla”ong u Bernard. U la kynnoh ruh ba tang ka Hub News kaba ïoh ban ring ha ka por ba khynra namar kane ka dei ka channel jong ka NPP.