Nongpoh, Naitung 23 : Ka Meghalaya State Olympic Association (MSOA) ha ryngkat ka jingïatreilang bad ka Directorate of Sports and Youth Affairs ka jylla hynin ka sngi kila hiar sha ka thaiñ Ri-Bhoi ban lum ban lang ïaki rang bad thei ïalehkai ba kynsai ban sei madan ïaka sap ka phong kaba ki don bala pynlong ha Indoor Stadium Umlyngkdait bala tip kum ka ‘State Talent Identification’.
Da ki spah ngut ki samla kynthei bad shynrang naki skul bapher bapher ba kynthup ruh ki club shimet kila wan ban shim bynta ha katei ka sngi, ha kaba la sakhi da ka jingdonlang u Bah John F Kharshiiing Working President ka MSOA, u Bah Boby L Nongbet DSO ka Ri-Bhoi, u Ian Campbell u ba dei u nongïalehkai Olympic bala shongthaid ka ri Australia u ba la lam khmat ban jied ruh ïa kitei ki rang bad thei don sap.
Haba kren ha katei ka sngi naka liang u Bah John F Kharshiing u la ong ba ka jingthmu jong katei kaa prokram ka long ban jied kyrpang ïaki samla ba donsap haka kam ïalehkai sports lyngba ki 4 tylli ki jingïakhun ba ki hap ban pyndep ba kynthup ïaka 20m sprint,10m ladder, Compass drill, Vertical jump haka por bala buh bad ïa katei ka prokram la pynlong ha baroh ki district jong ka jylla, bad ïaki nongïalehkai ba tbit yn jied hadien ba kila lah ban pyndep ïa kitei ki jingïakhun.
“lada ka sorkar ka shimkhia kitei ki nongïalehkai ki lah ruh ban shah pyntbit haki jaka hikai ba paw ka pyrthei kaba long ka jingkyrkhu ïakitei ki samla hadien bala jied kyrpang ïaki da u nongïalehkai Olympic ba paw ka ri Australia” la ong u Bah Kharshiiing da kaba bynrap ruh ba lyngba katei ka prokram yn lah ban kyntiew ïaka kam ïalehkai sports haka jylla.
Naka liang jong u la kyrpad ruh ïaki bor pynïaid skul ba kin shim kabu ïa katei ka prokram ba kyrpang ban phah ïaki khynnah kiba don sap khnang ba yn lah ban jied ïaki naka bynta ki jinghikai pyntbit halor ka sap kaba ki don kumba katei ka prokram ka dei ruh ka sien kaba nyngkong haka jylla.
Ha katei ka prokram la sakhi ruh ïaka sap ba kyrpang bala lah ban jied ha kaba u Heprit Rooney Lyngdoh 11 snem ka rta u la lah ban mareh ïaka 10m ladder run tang hapoh 2.71 second, da ka kjat suda ba u dei u heprit ba nyngkong ha katei ka rta ban pyndep ïa katei ka jingmareh, nangta ka Samla Badahunlang Syngkli 18 snem ka rta kaba la pyndep ïaka Vertical Jump 50cms bad ka dei kaba tbit tam haka jylla Meghalaya bad u heprit Kitboklang Shangpliang 15 snem ka rta bad u ba la lah ban pyndep tang hapoh 2.37 seconds ba u dei u heprit ba 3 naka jylla ba hapoh 15 snem
