“Wat ap haduh da duh mynsiem briew”, takraiñ u MLA Umroi ïa ki ophisar MeECL halor ka jingïap ki lai ngut ki heprit

Nongpoh, Naitung 17: Hadien ka jingjia kaba sngewsih ha shnong Umtangling, Ri-Bhoi District, kaba la shim noh ïa ka jingim jong lai ngut ki heprit na ka jingshah bat ha ka bording ilektrik, u MLA ka Umroi Constituency Bah Damanbait Lamare mynta ka sngi u la leit ban ïasyllok bad pynpaw ïa ka jingsngewlem sha ka longïing kaba la mad ïa katei ka jingjia kaba kthang bad sngewsih tam.
Hadien ka jingwan sngewlem, u MLA ryngkat bad u MDC barim ka Umroi Constituency Bah Rangkynsai Kharbuki ki la leit ban ïakynduh ïa ki ophisar ka Meghalaya Energy Corporation Limited (MeECL) ha Umiam ban ïakren markhmat halor katei ka jingjia bad ban wad ïa ki daw kiba la wanrah ïa ka jingduh noh jong kitei ki lai ngut ki heprit.
Haba kren bad ki ophisar u Bah Damanbait Lamare u la pynpaw ïa ka jingsngewkhia kaba jur bad takraiñ ïa ka tnad MeECL halor ka jingbym shimkhia ïa ki jingujor, u la ong ba katkum ka jingïoh jingtip jong u, u Rangbah Shnong ka Umtangling u la dep ban pyntip lypa sha ka tnad MeECL shaphang ka jingma jong ki sainar bording ha katei ka shnong, hynrei ym shym la don kano kano ka sienjam kaba kloi ban shimkhia ïa katei ka jingujor.
U MLA u la ong ba lada ka tnad ka la leh eiei ha ka por kaba biang, katei ka jingjia kaba sngewsih kan ym jia satia.
Shuh shuh, u Bah Lamare u la ong ba ki ophisar sorkar kim dei ban ap haduh ba kan don ka jingjia kaba shim mynsiem briew shuwa ba kin shimkhia ïa kano kano ka kam bad haba don kano kano ka jingujor, khamtam kaba ïadei bad ka jingshngaiñ jong ki nongshong shnong, ki dei ban leh mardor bad ym ban pynslem la ka dei kaba khlem jingthoh, namar kum ki ophisar kim dei ban ap haduh ban ioh jingthoh ban ieh pat shadien ïaka jingshngaiñ ki paidbah, namarkata kum kine ki jingjia kim dei shuh ban dang jia lano lano ruh nangne shakhmat, u la bynrap.
U la pynpaw ruh ba kum ki shakri paidbah, ki ophisar ki dei ban burom ïa ki nongshong shnong kiba wan ban ujor ne wad jingïarap, namar la don ruh ki jingud ba katto katne ki paidbah ki la mad ïa ka leh meng jong ki ophisar ka tei ka tnad haba ki leit ban ïakynduh.
Ha kajuh ka por, u MLA ka Umroi u la ban jur ba ka MeECL ka dei ban pynkloi ïa ka jingsiew bai lutksan sha ki longïing kiba la shah ktah ha katei ka jingjia. U la ong ba watla ym don satia kano kano ka pisa kaba lah ban pyndap ïa ka jingduh jong ka longïing, hynrei ka jingïarap na ka sorkar ka long kaba donkam ban kyrshan ïa ki ha kane ka por kaba eh.