Ba don ki projek ba ïaid suki 30 tarik yn hiar hi u Dy. CM sha New Shillong Township ban leit buddien

Shillong, Naitung15 : U Symbud Myntri Rangbah ka jylla ba dei peit ïa ka Tnad Urban Affairs, u Bah Sniawbhalang Dhar ha ka sngi Balang u la ong ba un leit hi ban jurip ïa ki projek bapher bapher ha New Shillong Township ha ka 30 tarik Naitung ban bishar bniah ïa ka jingïaid shaphrang jong ki kam.
U la ong ba watla bun ki projek ki dang ïaid shaphrang bha, hynrei don katto katne kiba dang suki.
“Don katto katne ki projek kiba ka kam ka la ïaid stet bha, hynrei don ruh kiba dang suki. Kumta nga la buh por ha ka 30 tarik Naitung ban leit jurip hi ïa ki. Ngin pyrshang ban pynbeit ïa kino kino ki jingeh lada don,” u la ong.
Ha kajuh ka por u la ïathuh ba ka sorkar kan kyntu ïa ki contractor ba kin pynsted ïa ka jingpyntrei ïa ki projek khnang ba kin lah ban pyndep ha ka por kaba la buh.
“Nga la ïoh jingtip na ka ophis u Myntri Rangbah ba katto katne ki projek ki dang ïaid suki. Ym dei ba ki la suki than hynrei ki khlem ïaid katkum ka thong ba yn lah ban pyndep katkum ka por ba la buh,” u la ong.
Haba kylli halor ka daw jong ka jingslem, u la ong ba ka jinghap slap kaba jur ha Meghalaya ka dei kawei na ki dawbah.
“Ka Meghalaya ka dei ka jylla kaba jur bha u slap, kumta ka por treikam ka duna bad ka long tang kumba hynriew haduh hynñiew bnai,” u la ong.
Shuh shuh haba pynshai haba ïadei bad ka jingpyllait pisa u la pyntip ba kam don jingeh satia namar ka sorkar ka siew ha ka por kaba biang.
“Ki contractor ki la ong ba ka jinghap slap ka la pynslem ïa katto katne ki projek, bad ngin dang ïatreilang bad ki ban pynsted ïa ka kam,” u la ong.
Halor ka jingkylli la ki contractor kin shah pynshitom lada ki pynslem ïa ki projek, u Bah Sniawbhalang u la ong ba ki kyndon jingïateh kular ki ïapher na kawei ka tender sha kawei pat. Hynrei u ong pat ba lada u contractor u pynslem khlem kano kano ka daw kaba biang, un shah pynshitom katkum ki kyndon ba la kdew ha ka jingïateh kular.