Shillong, Naitung 14 : Ka East & North East Zone Judges Seminar/Workshop ka Archery Association of India ïa kaba la pdiang bad pynlong ïa ka da ka Archery Association of Meghalaya (AAM) ryngkat ka jingïatrei lang bad ka tnat jong ka Directorate of Sports & Youth Affairs ka sorkar jylla, la sdang ïa ka naduh hynnin ka sngi ka 13 tarik u Naitung bad kan kut ha ka 16 tarik.
Ïa kane ka prokram la pynlong ïa ka ha ICSSR NEHU, bad mynta ka sngi, ka 14 tarik la leit ban plie ïa ka da u Myntri ba dei khmih ïa ka tnat Sports & Youth Affairs ka sorkar jylla u bah Wailadmiki Shylla bad don lang u Rupesh Kar, ba dei u International Judge of World Archery, uba wan ban shim ïa ka bynta kum uwei na ki riew shemphang (resource person) ba la phah kyrpang ïa u da ka synjuk ka Archery Association of India.
Ha ka jingïalang plie, la sakhi lang ruh da ki dkhot ka AAM. Kane kan dei ka sien ba nyngkong ba ïa kum kane ka lympung ïa phylliew jingmut, ai jinghikai ïa ki nongbishar (judge) ban lah ha kaban pynlong hangne hapoh ka jylla, ïa kaba la poi ban ïashim bynta da kumba 42 ngut na ki 8 tylli ki jylla.
La khmih lynti ba kane ka lympung ïa phylliew jingmut bad ai jinghikai, kan ïarap shi katdei ïa ki nongïalehkai barim bad ba la shongthait bad kumjuh ïa kito kiba don ïa katta ka jingieit ne sngewtynnad ïa ka ïalehkai siat khnam ba kin ïakhun ha ka jingim ïa ka kam ban long kum ki nongbishar ne ban pynïaid ïa ki ïakob siat khnam.
