Sha Dhaka yn mihkhmat ki samla ka jylla ïa ka India ha ka lympung ïalehkai Karate mynta u bnai

Shillong, Naitung 14 : Hadien ki jingïalehkai kiba bha ha kine ki khyndiat por ba la dep, ar ngut ki nongïalehkai karate na Meghalaya ba kynthup ïa u samla Gideon Tympuin bad Daniel Dabiangbha Warjri ki la shah jied ban mihkhmat ïa ka ri India ha ka 10th Cadet, Junior, U-21 bad Senior South Asian Karate Championship 2026 kaban long ha Bangladesh.
U Gideon un ïakhun ha ka jingïakob Men’s U-21 Individual Kata, katba u Daniel un ïashim bynta ha ka jingïakob Boys’ Junior Individual Kumite (-68 kilo).
Ïa kane ka lympung yn pynlong ha Dhaka naduh ka 15 haduh ka 19 tarik Naitung.
U Gideon u la ïoh rah ïa ka takma ksiar na ka bynta ka Meghalaya ha ka 5th KIO Senior & U-21 National Karate Championship 2026 kaba la long ha New Delhi ha u Rymphang bad Lber, katba u Daniel u la ïoh ïa ka takma rupa ha ka jingïakob Individual Kumite Junior (-68 kilo) ha ka 5th KIO Sub-Junior, Cadet & Junior National Karate Championship 2026, kaba la long ha Dehradun ha u Jylliew mynta u snem.
Na ka liang ka All Meghalaya Karate-Do Association (AMKA) ka la pynlong ruh ïa ka jingïalang ai khublei bad ïathuh ïa ka jingïaid lynti jong kine ki ar ngut ki nongïalehkai ha ka sngi Saitjaiñ.
Ka AMKA ka la ai ruh ïa ka jingïaroh kaba khraw ïa kine ar ngut halor kane ka jingïoh bynta kaba kyrpang. Ka seng ka la kitbok kitrwiang ïa ki ba kin leit poi suk sha Dhaka bad ba kin lehbha ha kane ka lympung jingïakob.
“Ngi ngeit skhem ba kin lah ban pyni ïa ka sap kaba kynsai jong ki bad ban wanrah nam bad burom ïa ka jylla Meghalaya bad ïa ka ri India,” ong ka AMKA ha ka kyrwoh ba la pyllait paidbah sha ki lad pathai khubor.