Haduh 71.93% ka jingpyntreikam ïa ka SIR ha Ri Bhoi, kyrpad u DEO ïa ki paidbah ban ïashimbynta

Nongpoh, Naitung 13: Ka jingpyntreikam ïa ka Special Intensive Revision (SIR) jong ka Electoral Roll hapoh Ri Bhoi District ka dang ïaid shakhmat hapoh ka jingïalam jong u District Election Officer (DEO), Ri Bhoi. Haduh ka 10 tarik Naitung, 2026, la dep ban sam haduh 1,47,985 tylli ki enumeration form kaba kot haduh 71.93%.
Ka jingïaid shaphrang ha ka jingsam ïa ki Enumeration Form ha ki constituency bapher bapher ki kynthup ïaka 8-Mawhati kaba la poi kumba 83.61%, 9-Nongpoh- 82.26%, 10-Jirang-58.33%, 11-Umsning- 71.52%, 12-Umroi- 63.30%.
Ban pynkhlaiñ ïa ka jingtip paidbah bad ban pynthikna ba ki paidbah kin shim bynta pura ha kane ka kam, u District Election Officer u la pynlong ruh ïa ka jingïalang bad ka Synjuk ki Rangbah Shnong ka Ri Bhoi District ban batai shai ïa ka jingthmu, ki rukom treikam bad ka jingdonkam jong ka Special Intensive Revision. Ha katei ka jingïalang, la kyrpad ruh ïa ki Rangbah Shnong ba kin ai ka jingïatreilang da kaba pynshlur ïa baroh kiba don hok ban thep vote ba kin ïashim bynta ha kane ka jingkhmih bñiah bad ban ai ka jingïatreilang pura bad ki Booth Level Officer (BLOs).
Shuh shuh, ban pynsuk ïa ka jingpyntreikam, u District Election Officer u la buh ruh ïa ka SIR Help Desk ha ophis jong u Deputy Commissioner, Ri Bhoi District. Kane ka Help Desk kan ai jingïarap ïa ki Booth Level Officer bad ïa ki paidbah kiba donkam jingbatai ne jingïarap halor ka Special Intensive Revision.
U District Election Officer u la kyrpad ïa baroh kiba don hok ban thep vote ba kin ai ka jingïatreilang bad ki Booth Level Officer bad ban pyndep noh ïa ka Enumeration Form hapoh ka por ba la buh, khnang ban pynthikna ba ka Electoral Roll kan long kaba biang bad kaba thikna.
Lada ki paidbah ki donkam jingïarap ne jingbatai shaphang ka Special Intensive Revision, ki lah ban phone sha ka SIR Help Desk ha u nombar 9863985792.