Shimbynta shitrhem ki samla haka TEJAS Workshop ha Ri-Bhoi, ban kyntiew ïa ka sengkam sengjam
Nongpoh, Naitung 13: Kum shi bynta jong ka jingthmu ban kyntiew ïa ka sengkam sengjam khamtam ha ki shnong nongkyndong, ka Startup India hapoh ka Department for Promotion of Industry and Internal Trade (DPIIT), Ministry of Commerce and Industry, jong ka sorkar India, ryngkat ka jingïatreilang bad ka Department of Industries & Commerce, jong ka sorkar Meghalaya bad ka bor district, Ri Bhoi, ka la pynlong ïa ka TEJAS (Transforming Entrepreneurial Journeys Across States & Districts) Workshop ha Parish Hall, Nongpoh, Ri Bhoi District.
Ka TEJAS ka long ka jingïalap kaba la sdang ha ka ri India, ban kyrshan bad ban pynroi ïa ki samla ban sengkam, da kaba ai lad ïa ki ban ïoh jingïarap lyngba ki jinghikai, jingïalam lynti (mentorship), bad ïa kane ka prokram la pyntreikam ha 132 tylli ki distrik ha kylleng ka ri India, da ka jingthmu ban pynkhlaiñ bad ban pynbun ïa ki lad jingïarap sha ki samla.
Ïa kane ka workshop la pynïaid da ka ophis jong u Deputy Commissioner, Ri Bhoi District, ha ka jingdonlang u Chaitanya Awasthi, SDO Patharkhmah Civil Sub-Division, ka E.N. Marak, Assistant Commissioner, Bah O. Mawthoh, Functional Manager, DCIC, Bah M. Kharmyndai, DPM-MBMA bad u Bah R. Wankhar na PRIME Meghalaya lem bad kiwei kiwei.
Ha kane ka workshop, ki ophisar na Startup India, DPIIT ki la batai shaphang ki skhim bapher bapher kiba don bynta bad ka sengkam, hynrei la pynlong ruh ïa ka jingïatai halor ka One District One Product (ODOP) bad ki jingai jinghikai na ki nongsengkam kiba la jop, kynthup ïa u bah R. Lyngdoh, u nongshem jong ka Rynsan Creation Pvt. Ltd., ka kong I. Rymbai, nongshem jong ka Eriwave, bad u bah G. Dui, nognshem jong Duia Trailblazers.
Palat 180 ngut ki nongshim bynta, kynthup ïa ki kynhun bapher bapher bad ki samla kiba kwah ban sengkam, ki la wan jingïashim bynta ha kane ka workshop kaba la ai jingmyntoi shibun ïaki samla kumno ban sdang sengkam, ki lad jingïarap lyngba ki skhim sorkar, ka jingïoh pisa, ka iew ka hat bad kiwei kiwei.
Kane ka sienjam ka long shi bynta jong ka thong jong ka sorkar India ban pynurlong ïa ka Atmanirbhar Bharat bad Viksit Bharat@2047, ban ailad ïa baroh ban ïoh bynta ha ka roi ka par jong ka ri.