Pyrshah ka SRSHMS ïa ka “Amendment of Section 16” jong ka KHADC ba ktah bad pynduh bor ïa ki Rangbah Shnong
Mawkyrwat, ‘Naitung 13 : Ka Synjuk ki Rangbah Shnong ka Hima Maharam Syiemship (SRSHMS) mynta ka sngi ka la pynlong ïa ka jingïalang bad ki Rangbah Shnong na ki shnong bapher bapher hapoh ka Hima Maharam Syiemship ban ïa tai sani halor ka “Amendment of Section 16” jong ka Khasi Hills Autonomous District Council (KHADC) ban wanrah ïa ka aiñ ban pynduh bor ïa ki Rangbah Shnong.
Ha kane ka jingïalang, ka Synjuk ka la pynpaw ba ha ka jingtyrwa ban pynkylla ïa ka Section 16, la thmu ban pyndam noh ïa ki kyntien “after prior consultation with the respective Dorbar Shnong, Dorbar Raid and the Dorbar Hima” kiba don hadien ki kyntien “Executive Committee” ha ka Principal Act. Kane ka mut ba yn weng noh ïa ka kyndon kaba dawa ïa ka jingïasyllok lypa bad ka Dorbar Shnong, Dorbar Raid bad ka Dorbar Hima shuwa ban shim rai.
U Bah Prosperly Wanniang uba dei u President ka Synjuk ki Rangbah Shnong ka Hima Maharam Syiemship (SRSHMS), haba kren sha ki lad pathai khubor hadien ba kut ka jingïamir jingmut, u la ong ba ka Synjuk ka pyrshah jur ïa kane ka jingtyrwa pynkylla aiñ namar ka lah ban pynduh noh ïa ka bynta bad ka bor jong ki Rangbah Shnong, Dorbar Raid bad Dorbar Hima ha ki rai kiba ïadei bad ka synshar paidbah kaba la wanrah hapoh ka KHADC lyngba u Executive Member ba dei peit ïa ka Land.
Ha kajuh ka por, ka Synjuk ki Rangbah Shnong ka Hima Maharam Syiemship ka la dawa ïa ka Khasi Hills Autonomous District Council ba ka dei ban peit bniah biang ïa kane ka Bill bad ban pynneh ïa ka kyndon kumba la mynjur bad pyntreikam ha ka Amendment kaba la wan ha u snem 2022, kaba dang pynneh ïa ka jingdonkam ban ïasyllok bad ki Dorbar Shnong, Dorbar Raid bad Dorbar Hima shuwa ban shim kano kano ka rai. “Ngim pyrshah ïa kiwei ki bill hynrei tang ïa kane ka “Amendment of Section 16” kaba mynta”, ong u President.
Ha kawei pat ka liang, kum ka Synjuk ka ai ruh ka jingkyrshan ba pura ïa ka jingshim rai jong ka Synjuk Ki Rangbah Kur Ka Bri U Hynñiewtrep, kaba la pynpaw ïa ka jingpyrshah jong ka halor kane ka Bill.