Shillong, Naitung 13: Ki bor pyniaid jong ka South West Garo Hills ha ka sngi Nyngkong ka la pynmih ïa ka Emergency Preparedness Order kaba hap hapoh ka Disaster Management Act, 2005, kaba buh ïa baroh ki tnad sorkar bad ki tnad emergency response agencies kaba khraw hadien ka jingkhein jong ka tnad India Meteorological Department (IMD) ba kan don ka jingslap jur bad ka jingther pyrthat.
Katei ka hukum, kaba la pynmih da ka Deputy Commissioner, ka Hema Nayak, ka bthah ïa baroh ki ophisar, ba ki dei ban don beit ha ki jaka treikam jong ki bad ban long kiba kloi ban leh ïa ki kam ba kyrkieh. La bthah ïa ki Quick Response Teams (QRTs), ka State Disaster Response Force (SDRF), ki Fire & Emergency Services, ki Police, Civil Defence & Home Guards, bad ka medical teams ba kin long kiba la pynkhreh na ka bynta kano kano ka jingjia.
Ka bor pyniaid district ka la hukum ruh ba ki tiar pynlait im, ki kali, ki tiar ba donkam kyrkieh, ki marbam, ki um dih, ki dawai, bad kiwei kiwei ki tiar ba donkam ki dei ban long kiba la pynkhreh na ka bynta ban phah mardor.
Ban pynthikna ïa ka jingbuddien bad ka jingïatreilang kaba stet, ka District Emergency Operation Centre (DEOC) ha South West Garo Hills kan treikam 24×7.
Ki bor pyniaid ki la kyrpad ïa ki nongshong shnong ban long kiba husiar, ban kiar na ki jingleit jingwan ki bym donkam ha ki por ba jur slap bha, bad ban ïatreilang bad ki bor synshar katba ka district ka dang pynkhreh ïa ka jingkhmih lynti jong u slap uba jur.
