Haduh ki pyntha phlang ba jyrngam shong i khynnah halor ki muid haba leit sharai ïa ki

Nongstoiñ, Naitung 12: Ka jinglong khynnah ha ki por ba mynshuwa ka dei ka por kaba kmen tam kaba uwei pa uwei u briew haba u kyrtiang dien ïa ki por jinglong khynnah teng teng um lah khlem da puson bad kren ha la marwei ban ong “Sa shisien pat te nga dang kwah ban long biang u khynnah”.
Haba ngi phai sha ka jinglong jingim ha ka por ba dang khynnah khamtam kiba dei na ki nongkyndong ki don ïa ka jinglong kaba kham pher ha kiba bun ki liang la ka dei ha ka jingtip ïa kiei kiei kiba ïadei bad ka jinglong jingman jong ka mei mariang, ki khlaw ki btap, ki krem ki koh, ki sim ki doh, ki mrad ki mreng bad ki jingri jingdup.
Haba phai sha ka jinglong jong ki khynnah ha kine ki sngi la ñiar eh ban shem ïa kiba dang don ïa ka jinglong kaba shi sur kumba long ha ki por ba mynshuwa eh.
Dang ha kine ki khyndiat sngi ba la dep ha ka por ba dang leit jingleit haba la poi hajan kawei ka shnong la ïa iwei i khynnah kynthei imat i la don kumba khatar ne khatlai snem ka karta iba shong kulai ha lor kawei ka muid bad ki don de sa san tylli kiwei pat ki muid bad shi kynhun ki blang bad haba kylli kumno im sheptieng ban shong kulai ha ka muid itei i khynnah i la ïathuh b aim sheptieng namar ba i la hikai ban pynjuh da kaba ai mluh man ka por.
Nalor kata i la ong ruh ba man la ka sngi saitjaiñ namar bay m long skul i ju leit sharai ïa ki muid bad ia ki blang sha lum bad haba i la pyllait ïa ki blang bad ki muid ki blang ki ki ialam sha khmat bad ki muid pat ki bud na dien bad namar ba ka jaka ka dang kylluid bad pahuh bha u phlang ki blang bad ki muid kim ju phet jngai .
Kaba kham sngewtynnad shuh shuh ka long ba itei I khynnah ila ong ba ha ki sngi ba ka bneng ka rang bha i smat ban ban leit sha ki wah ban jngi sngewbha ban rung sha ki khlaw bad kheit ki soh khlaw ba bun jait, ki wah duid ki dei ki jaka ba ipynlut por ban wad doh thli doh tham ki sim ki doh ki long kum ki paralok kiba isngew tynnad bha.