Pynkhreh ka nongbah Shillong ïa ka jingïalang baheh halor ka “NeztGen e-Gov Reforms”

Shillong, Naitung 12 : Ka Shillong kan wanrah lang ïa ki nongthaw policy kiba radbah ka Ri bad ki nongsynshar ha ka taiew ban wan ha ka jingialang bah ne ka National Conference ba arsngi jong ka Department of Administrative Reforms nad Public Grievances bad ka Sorkar Meghalaya kaba la pynlong halor ka phang “NextGen Administrative & e-Gov Reforms”.
Kane ka National Conference kan long ha ka 13 bad 14 tarik Naitung bad yn plie ïa ka da u Myntri ka Sorkar Pdeng u Dr Jitendra Singh bad u Myntri Rangbah ka Jylla Conrad K Sangma.
Palat 300 ngut ki Heh Ophisar na ka Sorkar Pdeng bad Jylla, ki District Collector, ki stad kot bad ki briew ba bat ïa ka bor synshar khadar kin wan ban ïashim bynta.
Ka jingïakren kan long eh halor kumno ki technology bad ki buit pynïaid kam ba thymmai ki lah ban ai ka jingshakri ba kham sted sha u paidbah, kaba kham shai bad kaba kham don ka jingkitkhlieh.
ïa ka conference yn plie da ka jingai jingbatai ka Meghalaya ïa la ki jingpynkylla ïa ka rukom treikam kiba buh hakhmat ïa u paidbah bad yn pynbud ïa ka jingpyni ïa ki prokram bala ïoh ïa ka khusnam na u Myntri Rangbah Duh naduh u snem 2023 bad 2024 kaba wanrah ïa u soh ka jingjop ha ka roi ka par ki district, ka pule dangle, ka kamai kajih ki nongkyndong bad ki prokram jong ka Aspirational District.
Kan don ruh ka bynta ba kyrpang ka ban ïakren ïa ki nongjop jong ka National Awards halor ka e-Governance 2026, ki ban pyni ïa ki digital project na ki Ministry, ka Sorkar Jylla, ki Public Institution bad kiwei kiwei.
Kane ka kynthup ïa ki application ba dang mih ha ka synshar khadar ha jaka sor, ka koit ka khiah, ka digital banking, ka jingpynïaid ïa ka jingïaid pilgrim, ka Panchayati Raj, jingïada ïa ki nongthied nongpet bad ka cyber security.
Namar ka jaka ba pynlong ïa ka conference, ka jingpynleit jingmut ba kyrpang kan long ïa ka thaiñ Shatei Lam Mihngi.
Kan don ruh ka bynta halor ki kam ban wanrah jingkylla bala lam khmat da ka Ministry of DoNER bad North Eastern Council (NEC) ha ki kam kum ka jingpynmih mar na ki siej bad agarwood, ka kam jngohkai, ki jingtei hapoh ka thaiñ bad ka jingpeitthuh ïa ki project.