Palat lak ngut khmih lynti ban poi sha ka Wangala Festival mynta u snem: Myntri
Shen yn jurip ban pynlong ïa ka Golden Jubilee jong ka 1000 Drum
Shillong, Naitung 12 : Ka Sorkar Meghalaya ka la pynkhreh ban pynlong ka jingleit jurip lang ïa ka jaka ban pynlong Wangala Festival ha Tura shuwa ban sdang ïa ka Golden Jubilee ‘1000 Drums Wangala’, ong u Myntri ka tnat Tourism ka sorkar jylla, u Timothy D Shira.
Haba kren bad ki lad pathai khubor, u Myntri ka tnad u la ïathuh ba ïa kane ka jingjurip la bthah da u Myntri Rangbah ka Jylla, Conrad K Sangma.
Na ka liang u Myntri u la ïathuh ruh ba kane ka tamasa mynta u snem kan long kaba kham heh shibun lada ia nujor bad ki snem ba la dep.
“Ngim khmih lynti tang ïa ka ‘100 Drums Wangala’ hynrei katkum ka prokram mynta kan long ka ‘1000 Drums Wangala’, kumta ngi khmih lynti ba kin don bun bha ki paidbah ban wan shim bynta,” u la bynrap shuh shuh.
U la ong ruh ba donkam ban peit bniah la ka madan ka lah neem ban pdiang haduh kumba 1 lak ngut ki paidbah, kynthup ia ki jaka pynieng kali bad ki surok kiban poi sha ka jaka ba pynlong ia ka tamasa.
Ha kane ka jingjurip yn ïashim bynta da u Commissioner & Secretary, Deputy Commissioner (DC), Superintendent of Police (SP), bad ki dkhot jong ka Wangala Committee.
La iathuh ruh ba hadien ba la aiti ïa ka kaiphod sha u Myntri Rangbah, yn sa pynlong biang ïa ka jingïalang ban shim ïa ki rai kiba donkam.
Haba kren shaphang ka jaka pynlong Wangala ha ki snem ban wan, u Myntri u la ong ba ka Sorkar ka la thied kumba 70 hectare ka jaka ha Gongnagre, hapdeng Jingjal, Williamnagar bad Samanda, ban pynlong kum ka jaka ba pura ban pynlong ïa ka Me’nong Festival bad kiwei pat ki jingïalang paidbah.
Hynrei, u la pynshai ba ïa ka Golden Jubilee Wangala yn ym pynkynriah sha katei ka jaka thymmai.
“Ka jaka kaba mynta ka dei ka bynta jong ka Wangala Committee, kumta ngin pynlong ïa ka Golden Jubilee hangtei hi. Ka jaka thymmai ka dang long bun da ki jingthung jingtep kumta kan shim por ban pynkhreh ïa ka. Nalor kata, lada pynkynriah mynta, kan pynduh noh ïa thong bad ka jingmut jong ka Wangala Festival,” la bynrap shuh shuh u Myntri haba kren bad ki lad pathai khubor.