Shillong, Naitung 12 : U Myntri Rangbah Conrad K Sangma ha ka sngi Saitjain, ula pynïaid ïa ka jingïalang bud dien ïa ki kam bad ki Deputy Commissioner lyngba ka video conferencing, ban lum jingkheiñ ïa ki jingktah jong u lapbah bad ban bthah ia ki bor District ba kin shim khia bad ai ïa ki lad jingïarap.
Kat kum ka jingïathuh ka Meghalaya State Disaster Management Authority (MSDMA), 32 tylli ki Shnong ha kylleng ka Jylla ki la shah ktah na ka jingther u slap ha kane ka taiew ba nyngkong u bnai Naitung.
Ki jingjia, khamtam eh ha ri-lum Garo bad katto katne ki bynta ka ri-lum Khasi, ki kynthup ïa ki jingtwa khyndew, ka jingtuid ka khyndew, bad ka jingpoi umsaw ha ki wah bad wahduid. Ym shym la don kano kano ka jingjia ba sngewsih ha kine ki jingjia.
Da ka jingbuh ka Meteorological Department ïa ka Meghalaya hapoh ka Orange alert bad ïathuh lypa ïa ka jingther u slap ha kylleng ki jaka kaba lah ban bteng haduh ka 15 tarik Naitung, u Myntri Rangbah ula bthah i\ ki bor district ba kin long kiba peitthuh bha.
U Conrad ula ban jur ïa ka jingdonkam “ka jingïatreilang kaba ïajan hapdeng ki bor district, ki kynhun ai jingïarap ba don ha ki Block bad kiwei ki tnad ba dei khmih, khnang ban pynthikna ïa ka jingshim khia ban leh eiei mardor haba don kino kino ki jingjia.
Halor ki jingtei, u Myntri Rangbah ula bthah ban buh hakhmat eh ïa ka jingpynbha biang ïa ki surok kiba la shah pynjulor ha u slap. Ula shong bishar ïa ka jingshah rong khyndew ha ka lynti sha ka Mineng Bailey Bridge kaba don marjan ka Gasuapara, South Garo Hills, ha kaba la pyrrkhing ba tang ki kali rit ki lah ban ïaid kata ruh hapdeng ka jingphikir bha.
U Conrad ula bthah ban leit jngoh bad ban shna pynbha biang shipor ïa ka surok kham kloi kat kaba lah.
Ula bthah ruh ban pynpoi ïa ki song jingïarap sha ki longïing kiba shah ktah khlem ka jingpynslem, pynpoi ïa ki marbar bad ki jingai jingshakri haba bthah ruh ïa ki bor district ba kin peitthuh bha ïa ka jinglong jingman da kaba ai jingtip ba man ka por sha ka Sorkar Jylla.
La bthah ïa ki paidbah ba kin long phikir bha da kaba kiar ban ïaid lynti na ki jaka ba jur ka jingtwa khyndew bad ki wah kiba shlei um, da kaba burom ïa ki jingbthah jong ki bor district, pynkynriah noh ïa ka leit ka wan ka bym da donkam na ki surok ba long riat ha ka por slap.
La bthah ruh ban phikir bha haba ïadei bad ka jingpom leilieh bad pyrthat.
