25 Metric Ton u Sohtrun la rah sha Delhi, kiew arsah ka jingïohnong ki nongrep

New Delhi, Naitung 12: Ka sorkar Meghalaya ryngkat bad ki nongrep ka la rah kumba 25 metric ton u sohtrun sha Nongbah New Delhi ban pynïaid ïew ha ka 4th Edition ka Meghalaya Pineapple Festival 2026, kaba la sdang haka sngi thohdieng ha Dilli Haat. Kane ka tamasa kaba lai sngi ka la khring shibun ki paidbah, bad la sakhi ba bun ki nongthied ki la ap lypa ban thied ïa u sohtrun na Meghalaya namar ka jingbang bad ka jingthiang jong u.
Haba kren sha ki lad pathai khubor, u Vijay Kumar Mantri, Commissioner & Secretary ka sorkar Meghalaya, u la ong ba nalor ba ka jylla ka pawnam ha ka mariang kaba itynnad, ka jylla ka long ruh kawei na ki jylla kiba pynmih ïa ki marrep kiba bha tam ha ka ri. U la ong ba u sohtrun na Meghalaya u la ïoh ka nam kum uwei na ki sohtrun uba thiang tam ha India, bad mynta u la poi ym tang sha ki ïew hapoh ka ri hynrei wat sha ki ri Middle East ruh.
U Vijay Kumar u la ïathuh ba kane ka dei ka sien kaba saw ba la pynlong ïa ka Meghalaya Pineapple Festival ha Delhi, bad man la u snem ka tamasa ka nang heh bad nang jop. U la ong ba kane ka jingjop ka dei namar ka jingïohi jngai jong u Myntri Rangbah ka jylla, u Conrad K. Sangma, uba la shim bun ki sienjam ban kyntiew ym tang ïa ki nongrep sohtrun hynrei ruh ïa ki nongrep shynrai Lakadong, u sying, u sohmrit bad kiwei pat ki mar rep.
U la ong ba lyngba kum kine ki tamasa, ki mar rep ka jylla ki ïoh rung sha ki ïew kiba heh, bad ka jingïoh nong jong ki nongrep ka la kiew arsah haba nujor bad ka dor ba ki ïoh lada die hapoh ka jylla. Ka sorkar jylla ka dang bteng ban wad lad ban pynjanai ïa ka rukom shalan bad jingïaid ïew khnang ba ki nongrep kin ïoh jingmyntoi kaba kham bun.
Ha kajuh ka por, ki nongrep sohtrun kiba la leit shim bynta ha kane ka tamasa ki la pynpaw ïa ka jingsngewnguh kaba khraw ïa ka sorkar Meghalaya kaba la plie lad ïa ki ban poi sha ki ïew kiba heh kum ka Nongbah Delhi.
Katto katne ki nongrep ki la ong ba kane ka dei ka sien kaba nyngkong ba ki poi sha Delhi, bad ki la pynpaw ba ka sorkar ka la shim lut ïa ka jingkitkhlieh naduh ka jingkit ïa u sohtrun ban pynpoi sha Delhi bad kiwei kiwei ki jingdonkam, katba ka jingïoh nong na ka jingdie ka long ka bynta jong ki nongrep.
U wei na ki nongrep sohtrun na Ri-Bhoi u la ong, “Mynta ka la kham suk ban shalan ïa u sohtrun sha ki jylla bapher bapher bad wat sha shabar ri ruh. Ngi ai khublei ïa ka Sorkar Meghalaya kaba la ïarap ïa ngi naduh ka jingthung haduh ka iew ban pynïaid bad die ïa u sohtrun, bad kane hi kan kyntiew ïaka ioh ka kot jong ki”.