Jowai, Naitung 11: Ka Dorbar Shnong Jaraiñ ha ryngkat bad ka Jaraiñ Cultural & Sports Club ha kane ka (10/07/2026) kila ïoh ban pynkup burom ïa u Saveme Tariang kum ka dak ka jingkitbok kitrwiang ïa u hashwa ba un mih na shnong ban leit ïalehkai bad ka FC GOA kaba dei ruh ka Club kaba ïalehkai ha ka ISL, ka league kaba heh tam ha ka Ri India.
Kum ka shnong ka dap da ka jingsngew sarong ïa u Saveme Tariang u ba la jam sha kawei pat ka kyrdan, Hooid ïa u Saveme Tariang la sdang ban ithuh ïa ka sap ïalehkai jong u lyngba ka jingleit ïashim bynta jong ka skul Amwi Jaraiñ Secondary ha ka Subroto Cup ha u snem 2019 kaba la pynïaid da u District Sports Officer jong ka Jowai dei ha kato hi ka snem ba ka North Liberty ka la ïoh ban leit mihkhmat ïa ka West Jaiñtia Hills District ha shillong bad ha kato hi ka snem ula shah jied ha ka Shillong Lajong bad nangta ula Sdang ban kiew ha ki kam ïalehkai Lyngba ka Shillong Lajong kaba dei ka Club kaba pawbha ha North East bad dei ruh ka Club kaba pynmih player na u wei u snem sha u wei pat.
Ïa ka jingïalang pynkup burom la pynïaid ïa ka jingïalang da u ma Kamwadamonmi Pamthied, La ïoh ka jingkren lyngkot na u Kallis Pohleng u ba dei ruh u President jong ka Jaraiñ Cultural & Sports Club kum ka dak ka jingaimynsiem ïa u Saveme Tariang, shuh shuh la ïoh ka jingkren na ka kur Tariang ha kaba ïadei bad ka jingïaid lynti u Saveme Tariang, kumjuh na u Waheh Shnong ka shnong Jaraiñ ma Shngainlang Suting uba la ai ban ai ka jingkitbok kit rwiang ïa u.
Na ka liang u kongsan uba dei ruh u MLA ka thaiñ ma Stephanson Mukhim ha ba ai jingkren u la ai mynsien ïa u Saveme Tariang um dei ban kut ha kane ka kyrdan hynrei u la ai mynsiem kum u nongïaleh u dei ban don ka thong shisien ka sngi ba un ïoh ban phong ïa ka Jersey jong ka Ri khnang ba kan long ka jingsarong ïa ka thaiñ ïa ka State hi baroh kawei, la pynkut ïa ka jingïalang da ka jingïaduwai lang.
