Nongstoiñ, Naitung 12: Ka lympung ïalehkai kynjat bol Subroto Mukherjee Cup 2026 jong ka West Khasi Hills District ka la poi sha kaba kut da ki jingïalehkai final ha ki kyrdan bapher bapher kaba la pynlong ha madan New Nongstoiñ.
Ïa ka jingïalang pynhap pyrda la wan ban pynshngaiñ da ka Deputy Commissioner ka West Khasi Hills District, ka Hema Nayak IAS, kum ka kongsan bad la synranlang ïa ka da u A.J. Sangma MPS Deputy Superintendent of Police West Khasi Hills, ka Kong B. Syiem District Sports Officer, lem bad kiwei pat ki riew rangbah.
Ha ka jingïakhun phainal jong ka Under-15 Boys, ka Kyrshai Government LP & UP School ka la rah ïa ka nam lahduh hadien ba ka la pynliem ïa ka Anderson Higher Secondary School lyngba ka tie-breaker.
Ha ka jingïakhun phainal jong ka Under-17 Girls pat ka Lurmangkara Secondary School Risiang, ka la pynliem ïa ka Nonglang Secondary School, Nonglang bad rah ïa ka nam lahduh. Ha ka jingïakhun phainal jong ka Under-17 Boys, ka Dapboklang Giri Memorial Secondary School Porla ka la lah ban pynliem ïa ka Sibsingh Memorial Government Higher Secondary School da 3 kol la 1.
Ha ka kyrdan Under-15 Boys, ïa u Apbanshai Syiem Shangoi na Anderson Higher Secondary School la jied kum Best Player, katba ïa u Ribankupar Parïong na Dapboklang Giri Memorial Secondary School la ai ïa ka khusnam Best Goalkeeper.
Ha ka kyrdan Under-17 Girls, ïa ka Lahunshisha Kharbani na Nonglang Higher Secondary School la jied kum ka Best Player, katba ïa ka Lily Ch. Marak na St. Xavier Higher Secondary School la ai ïa ka khusnam Best Goalkeeper.
Ha ka kyrdan Under-17 Boys, ïa u Ïohborlang Lyngkhoi na Dapboklang Giri Memorial Secondary School la jied kum Best Player, katba ïa u Vishalfield Nongbri na Bethel Press Higher Secondary School la ai ïa ka khusnam Best Goalkeeper.
Ka kongsan ka la ïoh ban sam ruh ïa ki khusnam sha ki nongjop bad ka la kyntu ïa ki kynhun kiba la jop ba kin ïai trei shitom bad pynkhreh bha na ka bynta ka State Level Competition.
Ka la ong ruh ba ka District Sports Office ka dang bteng ban wad bad kyntiew ïa ki sap jingïalehkai jong ki samla pule, kumta ka kyntu ïa ki ba kin pyndonkam hok ïa ki lad jingïarap kiba ka tnad ïalehkai ka ai.
