Shillong, Naitung 12: Ka ‘Dream Elite Pre-Season Summer Basketball Camp 2026’, ba la pynlong da ka DREAM ha ka jingïatreilang bad ka Dubakh Sports Pvt. Ltd. ryngkat ka jingkyrshan jong ka tnad Social Welfare, ka sorkar Meghalaya, ka la poi sha kaba kut ha ka sngi Saitjaiñ, 11 tarik u Naitung 2026, ha Pearly Dew School, Jaiaw, Shillong.
Wat hapdeng ka jinghap slap hynrei ka jingpyndep ïa ki jingïalehkai ba khatduh ba la pynbud da ka jingïalang pynhap pyrda, ka pyni ïa ka jinglah ban ïaishah, ka jingkut jingmut, bad ka jingshimkhia jong ki nongïashim bynta, ki coach, bad ki nongpynïaid.
Kane ka prokram kaba ar taïew ka la lum lang palat 100 ngut ki samla ïalehkai Basketball na ka nongbah Shillong bad ki jaka ba marjan.
Ha ka sngi ba khatduh la ïoh ban pyndep ïa ka jingïakhun phainal ha ki san tylli ki kyrdan, ba kynthup ïa ka: Special Batch, Girls Intermediate, Boys Intermediate, Girls Advanced bad Boys Advanced.
La wan sakhi lang ha kane ka sngi da u Francis Kharshiing- Ophisar IPS ba la shongthait bad u Director ka DREAM; ka Kong Barihunlang Wankhar, Headmistress ka Emjay Secondary School; bad u Dr. Tosanlang Kharsati – Principal jong ka Pearly Dew School Higher Secondary School.
La sdang ïa kane ka prokram da ka jingkren ai khublei na u Dr. Tosanlang Kharsati, uba la pdiang sngewbha bad ai khublei ïa ki nongïashim bynta, ki kmie ki kpa, bad ïa baroh kiba don bynta ban pynlong ïa kane ka camp kaba jop.
Ha kane ka jingïalang la sam ruh ïa ki syrnod sha baroh ki nongïashim bynta, ryngkat bad ki official camp T-shirts ryngkat ka bam, kaba pynlong ïa kane ka sngi kum ka jingrakhe kaba sah jingkynmaw.
Kane ka prokram ym tang ba ka pynleit jingmut ha ka sap ïalehkai Basketball hynrei ha ka jinglong ryntih, ka jinglong nongïalam, ka jingïatrei lang kum ka kynhun, ka rukom im kaba koit kaba khiah bad ka jingpynsngewthuh shaphang ka jingdih buaid.
