Ki don ki ban wohnia, ïa ka jingwan ïuhkjat jong U Himanta Sarma, Myntri Rangbah ka Assam, sha ka lehkmen Behdeiñkhlam ha Jowai, hynrei kitei ki dei tang ki jingkren lyngkot jingmut suda bad ha kiba kum kitei ki briew, ki kwah ba ka suloi ka dei ban ïa khun para suloi bad kim kwah satia ba ka um, kan iaid bad ka um bad ka snam kan ïaid bad ka snam.
Khlem da ïatai bniah ïa ka jing rakhe halor ka Behdeinkhlam, hynrei, ka por ka la dei ïa ki khlieh nongsynshar, ki trai jaka puta ba kin sngewjan bad sngewieid hapdeng jong ki bad ki para marjan na Assam; hynrei kane ka jingsngew ka iaid tang ha ka die ka thied, ka leit ka wan, katba tang shu la ïakren ia ki jaka puta, la mih u mawjynthut uba heh bha, namar ba ka sorkar Meghalaya, ka kwah bor, ka kwah burom bad ka ju kam trai halade bad ka shu pynlong langknia ïa ki Syiem, ki Dolloi, ki Rangbah Shnong, ki trai jaka bad wat ia ki dkhot jong ki District Council ruh kumjuh.
Ki nongïalam na Jaiñtia hills, lehse, ki la ïohi, ba ka jingshaniah ïa ka sorkar jylla, ka long kumba shaniah ïa ka dieng pyut bad namar kata, ki kwah ban wad noh, da ka lynti kaba thymmai bad ka mat kaba donkam bha ruh, ka wan hangne, ba lada ka Assam ka kam ia u pud jongka lehse haduh ha Jowai ruh, katei ka dei ka jingiaknieh burom jong ki ar tylli ki sorkar, katba ki trai jaka kiba don ia ki jaka jongki, sha lyngba jong katei ka jing iaknieh pud kim dei satia ban shah kurup bein, kumba ka la jia mynta ha ki bynta jong ka Lapangap bad kiwei de ki bynta jong ka Meghalaya.
Ka jingeh kaba mih mynta, ka long ba tang shu la shah jynrat ki jingthung, tang shu la shah knieh ki pynthor ne don ba leit tih surok, ki trai jaka ki phai pynban sha ka sorkar Meghalaya bad ha ka jing shisha, ki dei ban leit bad ki kot ki sla jong ki sha ki Deputy Commissioner jong ka Assam lane ba kin leit iakynduh ia u myntri ba peit ia ki jaka puta bad wat ia u myntri rangbah ka Assam, ban pyni, ba kitei ki dei ki jaka, ba ki long trai ma ki, khlem da iakren la ki hap ha Assam ne ha Meghalaya bad kane ka dei ka lynti kaba beit bad kaba shai ruh, khlem da shaniah lut naduh iba rit haduh kaba heh duh ha ka sorkar jylla.
Ka dei ka jingshisha, ba ka Assam, ka la pyniap ia ki phew ngut ki para ri jongngi, hynrei katei kam lah ban long ka daw ban ia thap kput lem, namar ba kitei ki jingjia, ki dei namar ka jingkhawpud jong ki nong ialam sorkar na Meghalaya, ba kim nud ban ia pyni bor ha katei ka por jong ka jingiakynad, namar ba ki leh buit tuh, ba kin ioh ban nang pynjrong ia kane ka ishu ia kynad.
Ngi dei ban kynmaw, ba ki don ki jaka kiba hap sha ka jylla Assam, hynrei ha ka kam Hima, ki dang iasnoh bad ka Hima Mylliem bad nangta ngi hap ruh ban peit na ki jingshisha, ba U Chief Executive Member jong ka Karbi Anglong, u khlain bor bha, ban ia U CEM jong ka Jaintia District Council bad kane ka dei beit thik, na ka jingknieh burom palat ka sorkar Meghalaya.
Lyngba ka jingwan ïuhkjat jong U Himanta Sarma sha ka lehniam Behdeiñkhlam, kumta ka por, ka la dei ba un long u kni rangbah jong ka thaiñ shatei lam mihngi bad kata ka long ba un long u nong pynïasuk, ym u nongpyn ialeh thma bad ha kajuh ka por, ba un lum un lang ïa ki nongïalam bapher, ban wan rah ïa ka jingïatylli kawei jong ka thaiñ shatei lam mihngi bad ban ïoh leit ïakren sha ka sorkar India.
Lah ban ong ba kine ki jingpyrshah ki dei ban long da ka rukom pyrkhat kiba biang khnang ba kan wanrah jingmyntoi jong baroh arliang.
