Shillong, Naitung 11: Lyngba jong ka ïew ki nongrep kaba la ïaid bha ha kine ki sngi, na ka liang jong ka sorkar ka kwah ban wanrah hajan ïa baroh ki nongrep bad kumjuh ruh ki nongthied kiba wan sha kane ka jaka kaba la sdang mynta la slem bha.
Kane ka ïew kaba dei kaba 7 jong ka Farmers’ Market, la pynlong ha ka Shillong, ha kaba ha kane la pyni ïa ki jhur, ki soh bad kiwei kiwei ki jingpynmih kiba thymmai kiba dei hi na kane ka jylla bad ki nongrep jong ka ha kaba kane ka pyni ïa ka jingangnud jong ka sorkar ban wanrah hajan ïa ki nongrep, ki nongthied jong ka jylla.
Ba la pynlong da ka 1917 iTEAMS hapoh ka tnat Agriculture & Farmers’ Welfare, ka sorkar Meghalaya, da ka jingkyrshan jong ka Meghalaya Farmers’ (Empowerment) Commission, kane ka ïew kaba la pynlong manla ka bnai ka la khring ïa kiba bun ki nongwan thied, ki nongrep bad kiwei kiwei kiba kwah ban kyrshan ïa la ka jong ka ïoh ka kot.
Kane ka jingsdang ka dei ruh kum ka jingangnud jong u Myntri Rangbah ka jylla u Conrad K. Sangma ban pynkup bor ïa ki nongrep, ban kyntiew ïa ka rep ka riang bad kumjuh ruh ka jingïakren kaba beit beit hapdeng ki nongrep bad ki nongtied ban ïoh ïa ka bam kaba bha bad kaba tei ïa ka met ka phad.
Na ka liang jong ka kong Jacinta Lyngdoh kaba dei na ka shnong Umngi ha Ri Bhoi district, haba ka wan ha kane ka ïew ki nongrep ha ka sien kaba ar ka la ïaroh bad ong ruh ba kane ka ïew ka long kaba kongsan bha naba la ïoh ba ïakren bad ki nongrep.
Ha kawei pat ka liang, u Bah Blackstone Nongkrot uba dei na Mawriang ha East Khasi Hills district, u ba la die ïa ki sohtrun kiba thymmai bad ong ruh ba kane ka ïew ka long kaba kongsan bha naba ka la ïarap ïa u ban u ïoh ban die ïa ki soh kiba thymmai bad kumjuh ruh ban ïoh ban ïoh ban kyntiew ïa ki mar rep ha kane ka kynti kaba mynta.
