Kyntait ka ïingbishar HC ban pdiang ïa ka jingdawa siew sut ki Nonghikai Deficit halor ka DCRG

Shillong, Naitung 11 : Ka ïing Bishar High Court jongka jylla ha ka sngi Thohdieng, ka la pynwai noh ïa ka mukotduma ba la mudui da ki saw ngut ki nonghikai deficit na West Garo Hills, kiba dawa ban siew ïa ka sut halor ka jingpynslem ban siew ïa ka Death-cum Retirement Gratuity (DCRG) ba la pynheh thymmai.
Haba bishar ïa ka mukotduma, u Justice HS Thangkhiew ula ong ba ym don satia ka sut kaba hap ban siew namar ïa ka DCRG ba la pynheh, la pynllait mardor tang mar syn mang ïa ka pisa.
Ki nongmudui- Hassain Ali Sarkar, Abdul Wahah Miah, Kanchon Begum bad Rahim Ali- ki la dep ïoh teng ïa ka pisa ba mar 3.5 lak tyngka ha ka dor jong ka DCRG kaba rim.
Hadien bala kyntiew ïa ka jingsiew sha ki Nonghikai ba ïoh jingïarap na ka Sorkar sha ka 10 lak tyngka, da ka jingmynjur ha ka 19.03.2025, la siew ïa ka pisa kaba sah mar 6.5 lak tyngka ha ka 28.01.2026.
Ka ïing Bishar ka ong ba naba ïa ka jingsiew la leh kat kum ka jingmang pisa ba 28.01.2026 khlem ka jingpynslem, “ym don sut satia ban hap siew”.Namar kata, ia kine ka mukotduma la pynwai noh.