Phah mih ka KSU ïa u Director ICAR shabar, khang tala ïaka ophis bym burom ïaka sngi Behdeinkhlam

Nongpoh, Naitung 09: Ka Khasi Students’ Union (KSU) Umiam Circle ryngkat bad ka Eastern Border Area mynta ka sngi ka la leit ban ïakynduh ïa u Director ka Indian Council of Agricultural Research (ICAR), Umiam, ban kyrpad ba ka shlem treikam kan ai shuti ïa ki samla pule bad ki nongtrei kum ka dak jong ka jingburom ïa ka sngi lehniam Behdienkhlam, kaba dei kawei na ki sngi kyrpang jong ka jylla Meghalaya.
Ka jingthmu jong ka seng ka long ban kyntu ïa ka ICAR ba kan pynsangeh ïa ki jingtreikam ha kane ka sngi ba kyrpang kaba dei ruh ka sngi shuti kumba la pynbna da ka sorkar, hynrei, ha ka jaka ban don ka jingïatreilang, u Director u la kren heh pynban bad pynpaw ba ka office kan bteng beit ïa ki jingtreikam kumba ju long. Kane ka la wanrah ïa ka jingbitar bad ka thma ktien kaba jur hapdeng u Director bad ki dkhot ka seng hynrei u Director u la pyneh triang bad um shym la mynjur ban ai shuti.
Hadien kane, namar ka jingpyneh ïaki dkhot ka seng naka liang ki nongïalam ka KSU North Khasi Hills District Unit, hapoh ka jingïalam u Samla Baiashanlang Kharshonlor, Organising Secretary, bad u Samla Stevenson Kharkhrang, Assistant Secretary, ryngkat bad kiwei pat ki nongïalam, ki la hiar sha katei ka jaka ban ïakren bad kyrpad biang ïa u Director ba un ai shuti ïa ki nongtrei bad ki samla pule kum ka dak jong ka jingburom ïa ka sngi Behdienkhlam.
Hynrei, u Director u la bteng ban pyneh kaba la pynlong ïaki nongïalam ban bitar bad beh syndon shabar naka kamra treikam jong u bad khang tala syndon ïaka ophis.
Naka liang ka seng ka la pynpaw ba kino kino ki shlem treikam kiba don hapoh u pud u sam ka jylla Meghalaya ki dei ban burom ïa ki sngi lehniam bad ki sngi kyrpang jong ka jylla, kumba la ai shuti da ka sorkar khnang ban pyni ïa ka jingïadei bad ka jingïaburom ïa ka kolshor bad ka riti dustur jong ki paidbah ka jylla.