Mairang, Naitung 09: U MLA ka Mairang Konstitwensi u bah Metbah Lyngdoh u ba dei ruh ha kajuh ka por u Myntri ka tnad power ka Sorkar Jylla, u la pynlong ïa ka jingleit jurip ïa ka Eklavya Model Residential School (EMRS) kaba don ha ka shnong Mawlyntriang Mairang C&RD Block, ha ryngkat ka jingsynranlang da u MDC ka Mairang Konstitwensi u bah Equator Nongrang, ka Deputy Commissioner EWKHD ka kong Anita Kharpor, u ADC u bah M.Diengdoh, u SDSEO u bah J.Thyrniang, ki Ophisar Sorkar, ki nongïalam shnong bad kiwei kiwei.
Ka jingthmu jong kane ka jingjurip ka long ban peit bniah halor ka jingpyntyllun ïa ka rukom treikam bad ka jingshna ïa ka ïing skul, khnang ba kan long kaba ïaid beit ïaid ryntih.
U bah Metbah u la pynpaw ba ka jingtrei ka dang ïaid shait shait bad mynta la lah ban pyndep haduh kumba 90 lane 95 percent. Ka thong ban pyndep ïa kane ka skul ka long ha u bnai Nailar bad shen yn sa pynlong ïa ka jingkhot Admission, khnang ba yn ïoh ban sdang noh ïa ka skul.
Shuh shuh, u la ong ruh ba kane ka skul kan long ka jingmyntoi na ka bynta kito ki longïing kiba duk ba kyrduh ki bym kot bor ban phah skul ïa ki khun. Ka thong kaba hakhmat eh ka long na ka bynta ki khynnah skul kiba na ka thaiñ Mairang Block.
Ym tang katta u la ong ruh ba ha kane ka skul ki khynnah kim donkam ban siew ïa ka bai skul ne ka bai hostel, hynrei yn bei tyngta ïa ka jinglut jingsep da ka sorkar pdeng kynthup ïa ka bam ka dih bad ki jaka sah. Nalorkata, u la ong ruh ba kane ka skul kan plie lad plie lynti ruh ha ka ïohkam ïohjam jong ki khun samla ka thaiñ.
