Shillong, Jylliew 30: Ka National Institute of Fashion Technology (NIFT), Shillong, ka la pynlong ïa ka Summer Boot Camp kaba la thmu ban pynshlur ia ka sap saindur, bad ban pyni ia ki samla pule ia ki jingsdang jong ka jinghikai shaphang ka kam saindur katba ki ai ia ka jingshemphang ha ka studio.
Ha kane ka sngi ki la don haduh 106 ngut ki khynnah skul na ki skul bapher bapher, kata ka KendriyaVidyalaya, Air Force Station, St. Edmund’s, BK Bajoria, bad BSF Senior School, kiba la pynrung kyrteng na ka bynta kane ka prokram.
Ha kane ka prokram la kynthup ïa ki jinghikai halor ki rukom treikam ba kongsan jong ka Tie & Dye, Kirigami, Knotting & Braiding ban pyni ïa ki samla pule ban pyndonkam ïa ki tiar ba kongsan kum ka jaiñ cotton, ka kot bad ki ksai.
Ïa kane ka jingïalang la pynïaid da u Nodal Officer of Admissions jong ka campus u Dr.T. MoasunepJamir, katba ki nonghgikai Kong Meaidibahun Blah, Bah KsankuparKhonstit bad ka TsheringDolkar ki la pyniaid ia ki jinghikai shaphang ki tiar ba pyndonkam.
U Dr. Brijesh Deore, Director ka NIFT Shillong u la iarohia ka jingshitrhem ki samla ha ka kam saindur katba ki dang iashim bynta ha ki kam kiba bun jait. Ha kajuh ka por kane ka prokram kalong kum ka kam ban pynsaphriang jingtip ba la sdang da ka NIFT Shillong.
Ha ka jingïalang pynkut la ïadonlang ka Kong AtodaSayo kaba dei ka samla pule barim jong ka NIFT Shillong. Ka la ai ka jingïaroh ïa ka kam ba la leh da ki samla pule bad ka la kren shaphang ka jingïaid lynti jong ka ha NIFT bad kumno kine ki jingtbit ba kongsan ki long ka sienjam ban ïaid shaphrang ha ka kam saiñdur. Baroh ki samla pule ki la ïoh ïa ka syrnot jong ka jingïashim bynta.
