Thaw thymmai ka Sorkar jylla ïa ki 3 tylli ki Regional Committee ban sdang biang ka jingïakren pynbeit pud

Shillong, Jylliew 30 : Ka Sorkar ka la thaw thymmai ïa ki lai tylli ki Regional Committee ki ban khmih ïa ki hynriew tylli ki jaka ki ba dang sahteng ban ïapynbeit pud bad ka Assam, bad la bthah ba kin aiti ïa ki kaiphod hapoh ka 45 sngi.
Ka jingpynbna bala pynmih da u Chief Secretary Dr Shakil P Ahammed ha ka sngi Ba-ar, ka la pynkylla thymmai ïa ka jingpynbna kaba la pynmih ha ka 20 tarik Lber 2023.
Kine ki Committee kin shong bishar ïa ka Langpih ha West Khasi Hills, Borduar, Nongwah-Mawtamur, Deshdoomreah, Block-II ha Ri-Bhoi bad ka Block-I, Psiar-Khanduli ha West Jaintia Hills.
U Symbud Myntri Rangbah ka Jylla u Bah Prestone Tynsong un khlieh ïa ka Ri-Bhoi District Committee, ka ban kynthup ïa u Myntri Sorkar Bah Sosthenes Sohtun bad MLA ka Nongpoh Bah Mayralborn Syiem, u EM ka KHADC Denzil Raynard Chen bad u Deputy Commissioner ka Ri-Bhoi kum u Member Convenor.
U Myntri ka tnad bording Bah Metbah Lyngdoh un khmih ïa ka West Khasi Hills Committee bad ki dkhot ki kynthup ïa u Myntri Sorkar Bah Methodius Dkhar bad ki MLA Bah RL Tongkhar, Remington Gabil Momin, CEM ka KHADC Winston Tony Lyngdoh, MDC Lurshai Kharbani bad ka Deputy Commissioner ka West Khasi Hills kum ka Member Convenor.
Ka West Jaintia Hills Committee kan dei kaba khlieh da u Symbud Myntri Rangbah Bah Sniawbhalang Dhar bad ki dkhot ki kynthup ïa u Myntri Sorkar Bah Lahkmen Rymbui, MLA Bah Comingone Ymbon bad Nujorki Sungoh, CEM ka JHADC Thombor Shiwat, MDC Aiborlang Shadap bad u Deputy Commissioner ka West Jaintia Hills kum u Member Convenor.
Kat kum ka jingpynbna, kine ki Committee kin ïatreilang bad ki Regional Committee ka Assam, ban ïa pynshisha ïa ki kyrteng jong ki Shnong kiba kam da ka Meghalaya na ki record ka Assam.
Kin pynshisha ïa ki jinglong ki jaka bad ka jingïajan bad ki shnong, khmih bniah ïa ki record halor ka jingdon ki nongshnong shnong bad ki Jaidbynriew ba sah, bad ban pynkhreh ïa ka “As-Is’ Public Asset Register ïa ki jingdon jingem jong baroh artylli ki Jylla.
Kine ki Committee kin hap leit jngoh ïa baroh ki shnong bad ïakren bad ki nongshong shnong, ki nongmihkhmat ki ADC bad kiwei kiwei ki kynhun ba don bynta, ban tip ïa kaei ka jingsngew jong ki briew kiba sah ha kine ki thaiñ.
Kin buh jingthoh ruh ïa ka jingjngai bad ka jingbam por na ki shnong sha ki jaka shakri paidbah ba ïajan eh lane ki Administrative Unit. Ki Deputy Commissioner jong ki District kin ai ïa ki jingkyrshan kiba donkam.
Ki Member Convenor jong kawei pa kawei ka Committee kin buh ïa ki sngi leit jngoh ïa ki shnong ha ryngkat ka jingïasyllok lang bad ki Committee na Assam.
“Ki Committee kin aiti ïa la ki kaiphod sha ka Sorkar Meghalaya hapoh ka 45 sngi na ka sngi ba pynmih ïa kane ka jingpynbna ka ban pynshong nongrim na ki jingjurip ïa ki shnong bad ba pynshong nongrim na ki khana pateng, ka jaidbynriew jong ki nongshong shnong, ka jingsngewsuk ki trai shnong ha ka liang ka synshar khadar bad ka jingsngew jong ki briew kiba sah ha kitei ki thaiñ” ong ka jingpynbna.