Nongstoiñ, Jylliew 30: Ka Deputy Commissioner, Eastern West Khasi Hills District ka la pyntip paidbah ba ka Sorkar Meghalaya ka la dep ban pyllait paidbah ïa ka Chief Minister’s Regional Transport Scheme (CM-RTS) lyngba ka tnat Transport. Ka jingthmu jong kane ka skhim ka long ban ai jingshakri ïa ki paidbah nongleit nongwan da ki bos ki ban ïaid na ki Block shaduh ki District Headquarter.
Lyngba kane ka scheme ka sorkar ka don jingthmu ban ïarap ban kyntiew ïa kito kiba seng kam lajong da kaba ñiah bad pynkamai ïa ki bos. Kine ki bos kin ai jingshakri kaba tikna bad ba lah ban shaniah ha ka dor ka ba rit na ka bynta ki paidbah. Kane ka skhim ka ai haduh 50 percent ka jingïarap pisa na ka sorkar na ka bynta ban thied ïa ka bos bad kiwei ki jingïarap kyrshan pisa.
Baroh kine ki bos kin long hapoh ka jingpeit jingkhmih jong ka sorkar ban pynïoh ka jingshakri kaba paka ïa ki paidbah. Ki dei ruh ki bos kiba la pyndait GPS na ka bynta ban pynsuk bad ruh ban pynïoh ïa ka jingshngaiñ. Ka sorkar kan ai ruh ïa ka jinghikai ha kito kiba la shah jied ban ïoh ïa kane ka skhim na ka bynta kumno ban pyntreikam ïa kine ki bos.
Namarkata, kino kino ki riew shimet kiba dei ki nong Meghalaya, ki nongpynïaid bos lane corporation, SHG, VO bad ki traditional institutions na Meghalaya ki lah ban aplai ïa kane ka skhim. Ki nongaplai ki dei ban long ki nongshong shnong ba pura jong ka jylla. Hynrei, yn nym shah ïa ki nongtrei sorkar, ki nongmihkhmat, ki political group bad contractor ban aplai ïa kane ka skhim.
Ïa ki jingtip ba kham bniah halor kumno ban aplai ïa kane ka skhim, ki lah ban peit lyngba ka Meghalaya One Portal lane lyngba ka ophis ka Deputy Commissioner, Eastern West Khasi Hills District, District Transport Office bad ka office jong u Block Development Officer.
