Shillong, Jylliew 29 : U Myntri barim ka Sorkar Meghalaya bad u nongïalam ka BJP, u Bah AL Hek, u la ong ba na ka BJP bad ka Sorkar jylla ki dang ïai buddien ïa ka jingdawa ban pyntreikam ïa ka Inner Line Permit (ILP) ha Meghalaya, hynrei u la ban jur ba ka kyndon kam dei pat ban pyrkhing shilliang ïa ki paidbah bad ka jingtuid nongjngohkai pyrthei.
Ha ka jingïakren bad ki lad pathai khubor, u Bah Hek u la ong ba ka Sorkar Pdeng ka dei ban bishar bniah ïa ka jingdawa ILP da kaba pynïahap ïa ka jingïada ïa ka jylla bad ïa ka ïaid ka ieng jong ki paidbah bad ki nongwan jngohkai pyrthei.
“Ka ILP kam dei ban long tang ka jingteh kyndon. Ka dei ban don ki kyndon kiba biang bad kiba ai jingmyntoi ym tang ïa ka jylla hynrei ruh ïa kito kiba wan sha Meghalaya namar ka jylla ka dei ban ïoh jingmyntoi na ka jingtuid ki nongwan jngohkai pyrthei,” u la ong.
U Hek u la pynpaw ruh ba namar ba Meghalaya ka dei ka jaka pdeng ba kiwei kiwei ki jylla ki hap ban ïaid lyngba ban leit sha kiwei pat ki jylla ba marjan lane ka transit state, kumta u ong ba hap ban peit ba kane ka kyndon kam dei ban pynthut ïa ka jingïaid lynti na kawei ka jylla sha kawei pat.
Halor ka jingdawa ban pynrung ïa ka ktien Khasi bad ka ktien Garo ha ka Khyrnit ba Phra jong ka Riti Synshar ka Ri, u Bah AL Hek u la ong ba dang shen ka BJP Meghalaya ka la phah shithi sha u Myntri Rangbahduh ka Ri, u Narendra Modi, ban kyrpad ba yn ai ka jingithuh noh ïa kine ki ar tylli ki ktien.
U la ong ba kino kino ki Ktien kiba la pyndep ïa baroh ki kyndon kiba la buh ban rung ha ka Khyrnit ba Phra ki dei ban ïoh noh ka jingithuh kham kloi.
“Lada ka ktien Khasi bad ka ktien Garo ki la pyndep ïa baroh ki kyndon kiba la buh, dei ban pynrung lang ïa ki ha ka Khyrnit ba Phra jong ka Riti Synshar ka Ri,” u la ong.
Katkum ka jingïathuh jong u, haduh mynta ka BJP kam pat ïoh kano kano ka jubab na ka Sorkar Pdeng. Hynrei u la ong ba ym tang ma u hynrei wat u President ka Meghalaya BJP ruh u la phah shithi sha u Myntri Rangbahduh ka Ri kum ka jingbuddien halor kane ka bynta.
