Shillong, Jylliew 29 : U MLA ka BJP u Bah AL Hek ha ka Lah Sngi U Blei ula ong ba u Myntri Rangbah Duh u Narendra Modi, ula phah da u laiñ ia ki Myntri ka Sorkar Pdeng sha Meghalaya bad kine ki Myntri ki la wan khlem sangeh ha ryngkat ki song kam pynroi, bad mynta ka shong ha ka Sorkar Jylla ban pynthikna ban pyntreikam hok ïa kine ki skhim.
“Nga kwah ban ai khublei ïa u Myntri Rangbah Duh namar ka jingphah da u laiñ ïa ki Myntri ka Sorkar Pdeng sha Jylla ha ryngkat ki song kam pynroi. Mynta ka dei ka jingkitkhlieh jong ka Sorkar Jylla jong ngi ba kan pyntrei ïa kine ki song kiba la phah da ka Sorkar NDA” ong u Bah Hek haba ïakren bad ki nongthoh khubor.
Haba kam halor ka jingkam burom ka NPP na kine ki skhim ka Sorkar Pdeng, u Bah Hek ula ïeng skhem ba ka thymmei jong kine ki skhim ka long kaba shai bha.
“Kano kano ka seng saiñ pyrthei ka lah ban shim ïa ka burom, hynrei baroh ki tip ba kine ki skhim baroh ki wan na u Myntri Rangbah Duh ka BJP. U dei u Myntri Rangbah Duh jong ka NDA, u dei na ka BJP. Kumta, kaei kaba lah leh ka dei namar ka jingkyrkhu jong ka BJP kaba don ha ka Sorkar Pdeng” ula ong.
Ula ban jur ba ka jingpyntreikam ka shong mynta ha ki tnad ba dei khmih jong ka Sorkar Jylla
“Lada ki skhim ki wan na ka tnad PWD, ka tnad PWD ka don la ka jong ka rukom pyntreikam ïa ki kam. Haba wan na ka tnad ka Koit ka Khiah, kane ka tnad ka don la ka jong ka rukom ban pyntreikam ïa ki” ula batai.
Haba kyntait ïa ki jingkynthoh ba ka jingtuid jong ki song jingïarap ka Sorkar Pdeng ka dei kaba la pyn ïahap por bad ka elekshon, u Bah Hek ula ong “Kam don jingïadei eiei ruh em bad ka elekshon. Kane ka dei ka kam pynroi. Ka kam pynroi ka jia ha kano kano ka por. Ngi la ïakhmih ïa ka jingwan bun ki kam pynroi sha Meghalaya, khamtam ha ka kam jngohkai, kam ïalehkai bad ka koit ka khiah”.
