Haba wan ki Myntri ka Sorkar Pdeng sha ka Jylla ki wanlang bad ki song pynroi – Bah AL Hek

By Mawphor Editor On Jun 30, 2026

Shillong, Jylliew 29 : U Nongïalam ka BJP ba dei ruh u Myntri barim ka Sorkar jylla , u Bah AL Hek, u la ai khublei ïa u Myntri Rangbahduh ka Ri, u Narendra Modi, halor ka jingphah bun ngut ki Myntri ka Sorkar Pdeng sha Meghalaya ryngkat bad ki song jingïarap bad ki skhim pynroi na ka bynta ka jylla.
Haba kren sha ki lad pathai khubor ha kane ka sngi Nyngkong, u Bah AL Hek u la ong ba mynta ka la dei ka bynta bad ka kamram jong ka Sorkar Meghalaya Democratic Alliance ban pyntreikam hok ïa kine ki skhim bad ki song jingïarap kiba la wan na ka Sorkar Pdeng.
“Mynta ka la dei ka kamram jong ka Sorkar MDA ban pyntreikam hok ïa kine ki skhim kiba la wan na ka Sorkar NDA,” u la ong.
U Bah AL Hek u la ong ruh ba watla ki seng saiñ pyrthei bapher bapher ki lah ban kam ba dei ki party jong ki, kiba wanrah ïa ki kam pynroi, hynrei u ong ba ki paidbah ki tip ba bun ki skhim pynroi ki wan na ka Sorkar Pdeng hapoh ka jingïalam jong u Narendra Modi.
“Baroh ki tip ba kine ki skhim ki wan na u Myntri Rangbahduh ka Ri. Watla u dei u Myntri Rangbahduh ka NDA, hynrei u dei ruh na ka BJP. Kumta, ïa ki kampynroi kiba poi mynta la kyrshan da ka Sorkar BJP ha ka Sorkar Pdeng,” u la ong.
U la pynpaw ruh ïa ka jingshaniah ha ki tnat sorkar bapher bapher kiba pyntreikam ïa ki skhim bapher bapher ha ka jylla la ka long naduh ka tnad Public Works Department (PWD), ka tnat ka Koit ka Khiah bad kiwei kiwei.
“Ka PWD ka don la ka jong ka rukom ban pyntrei ïa ki projek, kumjuh ruh ka tnat ka Koit ka Khiah ka pyntreikam ïa ki skhim ba ïadei bad ka koit ka khiah. Ngi shaniah ha baroh ki tnat ba kin pyntikna ba ki jingmyntoi jong kine ki skhim kin poi sha ki paidbah,” la bynrap shuh shuh u Bah AL Hek.
Une u rangbah u la ban jur ba ka sorkar jylla ka dei ban pyntikna ba baroh ki skhim kiba wan lyngba ki tnat bapher bapher kin poi sha ki nongïoh jingmyntoi.
“Kane kam dei satia kaba bynta kaba dei bad ka elekshon hynrei kane ka dei bad ki kam pynroi. Ngi ïohi ba bun ki kam pynroi ki dang bteng ban tuid sha Meghalaya, khamtam ha ki bynta jong ka kam jngohkai pyrthei, ki kam ïalehkai bad ruh ha ka koit ka khiah. Kumta ngi kyrpad ruh ïa ka Sorkar Pdeng hapoh ka jingïalam jong u Myntri Rangbahduh ba kin dang bteng ban ai shuh shuh ïa ki jingïarap bad ki projek pynroi na ka bynta ka jylla,” u la bynrap shuh shuh.