Khliehriat jylliew 29: Namar ka jingleh mynthi ka Jaiñtia Hills Autonomous District Council, ka Jaiñtia National Council (JNC) Central Executive Committee lem bad ka Jaiñtia Students’ Union Central Body (JSU) kin khih win biang na ka bynta ban iada ïa ka khyndew ka shyiap jong ki paidbah nongrep bad ki trai jaka kiba na elaka Nongkhlieh kiba la shah ktah jur ha kaba ïadei bad ka projek tih mawshun jong ka company Shree cement ha Lum Syrman.
Ha ka jingialang ba la pynlong myn sngi saitjañ ha kaba la ïa don lang ki trai jaka, ki paidbah nongrep kiba na elaka Nongkhlieh lem bad ki nongialam jong ka JNC bad ka JSU, u President ka JNC u bah Sambormi Lyngdoh u la ong ba “Ha ka jingialang ngi la iakren sani bha, ha kaba la ioh jingtip shuh shuh ba ymdei tang ka 217 hectares ka jaka kaba ka Shree cement ka thmu ban leh ïa ka projek jong ka hynrei haduh 652 Hektar, katba ka 217 kan dei tang ka phase 1.
Ki nongshong shnong Jong ka Elaka Nongkhlieh ki la shah shet kylla ha ka Shree Cement bad ki agent Jong ka company kiba don bynta lang bad ka sorkar jylla, ngi ka JNC bad JSU ngin ieng skhem ha ka nongrim ban iada ïa ka khyndew ka shyiap. Haka jingialang bad ki nongrep bad ki trai jaka ka elaka ngi la shim ïa ka rai Rangbah ban pynlong ïa ka jingiaid Rally ha sor jowai bad tur ruh sha ophis treikam ka JHADC, kumba ngi tip shai ba iaka district council lah ai bor da ka 6th shedule ban iada ïa ka khyndew ka shyiap hynrei kaba sngewsih ka long ba haduh mynta ka JHADC ka dang iohthiah hakane ka bynta” ong u bah Sambormi Lyngdoh.
Haba kren shaki lad pathai khubor u President ka JNC bah Sambormi Lyngdoh ula ong shuh shuh ba “Hadien ba ki paidbah nongshong shnong ka Elaka Nongkhlieh, Ki nongialam bad ki dkhot ka Hima Sutnga Youth Federation ka elaka Sutnga, ka ka JNC, JSU lem bad kiwei kiwei ngi la lah ban pynpulom ia ka public hearing jong ka Shree cement ha ka 22 tarik u bnai jymmang 2026, hynrei ka jingialeh kam pat kut, ka jingialang ba la pynlong ha ophis ka JNC ha Khliehriat myn sngi saitjain ruh ka la long kaba jop ha kaba ngi la iakren sani bha ia ki kam ba ïadei bad ka company Shree Cement”
“Haka jingshisha kumba la iathuh ba ïa ka Cement plant la dep iakut haka dorbar elaka ban shna ïa ka shabar na ki shnong ba shong briew sha ka jaka kaba tip kum ka “Lum Ryngksan” hynrei ki la pynkheiñ ïa kane ka rai da kaba rah ïa ka plant hapoh shnong Daistong, kaba kham sngewsih ba ki nongrep ka shnong Daistong ki la shah ktah bha ha kaba wat ki lynti iaid ban poi sha ki jaka rep ruh lah shah pom noh na ka daw ka jingpyntrei ïa kata ka plant jong ka Shree Cement, ha kane ka jingialang bad ki nongrep bad ki trai jaka ka elaka ngi la shim iaka rai Rangbah ban pynlong ïa ka jingiaid Rally ha sor bah Jowai bad ruh ban tur sha ophis treikam ka Jaiñtia Hilld Autonomous District Council, kumba ngi tip shai ba ïa ka District Council la pynkup bor da ka 6th Shedule ban iada kyrpang ïa ka khyndew ka shyiap hynrei kaba sngewsih ka long ba haduh mynta ka JHADC ka dang iohthiah lyngngai ha kane ka bynta” ong u President ka JNC.
“Kaba pynlyngngoh ruh ïa ngi ba kumno ia ki trai jaka kiba la don lypa ka Land Holding ha Lum Syrman, hynrei u Dolloi ka Elaka Nongkhlieh pat u register pynban ïa kita ki jaka hadien bad ka JHADC ruh ka kloi ban ai lane issue Land Holding biang ïa kita, kane ka dei shisha ka jingïuhroit ïa ka hok ki nongshong shnong jong ka Elaka bad dei hangne ba ngi la rai ban pynlong ïa ka jingiakhih ban kyrsiew thiah ïa ka JHADC, ka jingiakhih kan long ruh ha ki ar bynta kata ban dawa ïa ka hok ki nongrep bad ki trai jaka bad ban dawa sloit noh ïa ka jinglong Dolloi Jong u Dolloi ka Elaka Nongkhlieh namar ba u la pynkheiñ ïa ki aiñ ki kyndon ka District Council” ong ka JNC.
“Katkum ka Sanad treikam ba la pynmih na ka JHADC sha ki Dolloi ha ka point ne ka bynta kaba 7 ka kdew “Ba phim dei ban ai No objection certificate ne permission ban jurip ne survey ne pyndonkam ïa kano kano ka jaka khyndew ne khlaw la ki dei jong ki riew shimet ne jaka paidbah sha kano kano ka company khlem ka jingioh jingmynjur na ka dorbar elaka bad ka jingioh jingmynjur na ka District Council” bad ïa kane lah iohi shai ïa ka jingpyrshah jur jong ki khun ka elaka bad haduh mynta ym pat tip la ka district council ka la ai ne em ïa kata ka jingmynjur ïa u Dolloi ka Elaka Nongkhlieh ban pdiang ne ai NOC ia ka Shree cement ha Lum Syrman bad haba ngi peit ïa ka aiñ ba la shna da ka district council kaba ioh jingmynjur ruh na u Governor kaba tip kum ka “The Jaiñtia Hills Autonomous District Establishment of Elaka/Village and Election /appointment/power and jurisdiction of Dolloi/Sirdar and Waheh Chnong” katkum ka para ba 11 Jong kane ka aiñ kaba kren shai baka district council ka don ïa ka bor ban pynduh pyndam ïa uno uno u Dolloi lada u pynkheiñ ïa kino kino ki aiñ ka district council, lada ngi peit haka section 1 Jong ka para 11 haka point ba san ka kren shai “ba lada uno uno u Dolloi u ïuhroit ïa ka hok lane ialam bakla ïa ka elaka ka district council kalah ban weng syndon ïa u na ka kam Dolloi”. Te lada ngi phai ia kaei kaba lah jia bad ka case Jong ka Shree cement ngi iohi ba u Dolloi ka Elaka Nongkhlieh u lah pynkheiñ lut ïa kine ki aiñ baroh jong ka district council. Na kane ka daw ngi ka JNC, JSU bad ki nongrep, ki trai jaka ka Elaka Nongkhlieh ngin tur sha JHADC ban dawa pynduh noh shisyndon ïa u Dolloi bad ban bishar ïa ka hok jong ki khun ka Elaka Nongkhlieh” pynshai shuh shuh u bah Sambormi Lyngdoh.
Shuh shuh, u bah Sambormi Lyngdoh u la ong “Ngi iohi ruh ïa ka jingkren u myntri rangbah, u Conrad Sangma u ba la ong ba ka shree cement ka la bud ryntih thik ïa ki aiñ ka sorkar, te ka jingkylli ngi kwah ban buh ïa u myntri Rangbah ba ka jinglehbor ïa ki khyndew, ki jaka Jong ki nongshong shnong ka Elaka Nongkhlieh hato don mo kata ka aiñ ne ka bor kaba ai jingbit ïa ki company ban shu iuhroit bad knieh bor ia ka jaka jong ki ????. Ngi ka JNC bad JSU ngi ieng skhem ha ka nongrim ban ïada ïa ka khyndew ka shyiap ,ki pradoh prasnam bad lyngba kane ka khubor ngi khot ngi wer iaphi ki khun ka Ri Jaiñtia kumba juh Ong ka ktien ba “Kawei ka dkhot met ka pang hynrei ka ktah lut ïa baroh ka met” bad lada kawei ka shnong ka shah ïuhroit ka ktah lut ïa ka hok ka burom ka Ri Jong ngi, te ngi kyrpad jur ïa phi ban wan sha kane ka rally ha jowai haka 14 tarik july 2026, te ngi khot ngi wer ruh iaki para sengbhalang kiba sngewkhia ïa ka Ri bad ka jaidbynriew ban iasoh lang bad ngi ki ar seng lem bad ki nongrep, ki trai jaka ba ngin pynbor ïa ka Sorkar ba phim dei ban ïuhroit ïa ka hok ki pradoh prasnam ki jong ngi bad phim dei ban kheinpoh iangi ki nong Jaiñtia bad phim don hok hi ruh ban iuhroit ne aibor iaki company bakin ïuhroit ne knieh jubor ïa ka jaka Jong ngi. Ka message kaba shai ngi phah shaka sorkar ba lada u myntri Rangbah u nud ban sait na ka bynta ka Shree cement balei u sngap jar jar pat balei um kren naka bynta kine ki trai jaka ki nongrep kiba shah ïuhroit??? . Ngi kwah ruh ban phah ka khubor kaba shai sha ki nong mihkhmat ki jong ngi Naduh ki MLA ki MDC ba wat lehkai bad ka hok u paidbah ioh kan pluh ka ding ha Ri Jaiñtia ba ieid jong ngi lane ban shah knieh wat ka Synshar khadar ka jong ngi ha kita ki mynder”
Kumjuh ruh na ka liang u General Secretary jong ka Jaiñtia Students Union, u bah Neilkee Mukhim u la ong ba “Mynta hadien ka jingialang bad ki nongshong shnong ka Elaka Nongkhlieh ba kynthup naduh ki nongrep, ki trai jaka, ngi kwah ban kyntu ruh ïa phi ki nongshong shnong ka Elaka Nongkhlieh bad khamtam ki nong Daistong ba phim dei ban tieng ban smiej, kumba lah ioh jingtip bad ki nongshong shnong ka Elaka Nongkhlieh ki don hapdeng ka jingsyier mynsiem namar ba don kine ki mafia kiba pyntieng pynsmiej ïa ki, ngi khot iaphi baroh ba phin mih ban ialeh na ka bynta ka hok ka jong phi, kynmaw ruh ba ka hok ka jong phi ka ieng rasong, ka jakpoh kaba phi ju im man la ka sngi. Te ngi ngin ïa mih shakhmat ban ai bor ai mynsiem ïa phi ba phim dei ban tieng da lei lei ruh, ngi kwah ruh ïa phi ba phin sngewbha ban pynsngewthuh ïa ki nongshong shnong ka Elaka Nongkhlieh ba wat la ka sorkar ka leh donbor hynrei ka hok ka jong phi kan ieng bad yn sa ioh ka jingbishar hok ha kawei ka Sngi”
