Shillong, Jylliew 29: U Deputy Commissioner ka East Khasi Hills, Abhilash Baranwal, u la kyrpad ïa baroh ki nongthep vote kiba don hok ba kin shimkhia bad ïatreilang ha ka Special Intensive Revision (SIR) jong ka electoral roll, kaba yn sdang naduh mynta ka sngi, ka 30 tarik Jylliew bad bteng haduh ka 29 tarik Naitung. U la ong ruh ba ka jingthmu jong kane ka jingjurip ka long ban pynrung ïa ki nongthep vote kiba don hok.
Haba kren ha ka jingïalang bad ki lad pathai khubor ha ka Sngi Nyngkong, u Deputy Commissioner u la ïathuh ruh ba ki 1,021 ngut ki Booth Level Officers (BLOs) kin leit sha man la ki thliew ïing ha baroh ki constituency jong ka East Khasi Hills ban sam ïa ki self-enumeration forms kiba la dep pyndap lypa katkum ka Electoral Roll jong u snem 2025.
U la pynshai ba ka Electoral Roll jong u snem 2005 ka long ka nongrim jong kane ka jingjurip namar ka dei ka sien kaba khatduh ba ka Election Commission of India ka la pynlong ïa ka comprehensive revision ha ka ri.
U la ong ba ki paidbah ki dei ban pyndap bha ïa ki form bad aiti biang sha ki BLO. “Nga kyrpad ïa baroh ki nongthep vote ba kin shimkhia ïa kane ka jingjurip bad ba kim dei ban sheptieng. Ka jingthmu jong kane ka sienjam ka long ban pynrung bad ym ban weng ïa ki nongthep vote kiba don hok,” u la ong.
“Wat lada phi kylli ïa ngi ïa kajuh ka jingkylli bun sien, ngin jubab. Ngi kwah ban ïaid ryngkat bad phi bad pynthikna ba ym don uno uno u nongthep vote uba don hok ban shah iehnoh,” u la ong.
U Deputy Commissioner u la pyntip ba ha ka por ba ki BLO ki leit jurip, ym donkam satia ban aiti ïa kino kino ki kot jingïoh jingithuh. Tang ha ki katto katne ki khep ba donkam ban pynshai shuh shuh, yn sa kyrpad ïa ki paidbah ban wanrah ïa ki kot jingïoh jingithuh.
U la bynrap ba watla ka Election Commission ka la pynmih ka thup jong 11 tylli ki kot jingïoh jingithuh kum ka jingai nuksa, hynrei ki BLO ki la ïoh jingbthah ban pdiang ïa kino kino ki kot kiba lah ban pynshisha ïa ka jinglong nongthep vote, kynthup ïa ki certificate na ka Balang, na ki Rangbah Shnong ne kiwei pat ki kot ba don jingïadei. Ka rai kaba khatduh halor ka jingbit jong uno uno u nongthep vote kan long ha ka kti jong u Electoral Registration Officer (ERO) hadien ba la bishar ïa baroh ki kot ba la aiti.
Hadien ba kut ka jinglum jingtip, yn ai shi bnai ka por ban pdiang ïa ki claims bad objections, bad hadien kata ki ERO kin shim sa shi bnai ban bishar ïa ki shuwa ban pynmih ïa ka Final Electoral Roll ha ka 07 tarik Risaw, 2026.
U Baranwal u la ong ruh ba ki samla kiba la dap 18 snem hynrei kiba ym pat don kyrteng ha ka electoral roll ki lah ban pyndap ïa ka Form 6 ban pynrung kyrteng. U ong ba ki BLO kin wad ruh ïa kum kine ki briew ha ka por ba ki leit jurip ha man la ki thliew ïing.
U la pynshai ruh ba kane ka Special Intensive Revision ka dei tang ban pynshisha ïa ki nongthep vote kiba la don lypa ha Meghalaya. Kito kiba wan na kiwei ki jylla bad kwah ban pynkynriah ïa ka kyrteng sha Meghalaya ki hap ban pyndap ïa ka Form 8, bad yn bishar ïa ki katkum ki kyndon.
U Deputy Commissioner u la ong ba ki kyrteng kiba lah ban shah weng na ka electoral roll ki long tang kito kiba la khlad noh, kiba la kynriah jaka, kiba don ar sien ka kyrteng, lane kiba ym dei ki nongshong shnong ka Ri.
Ban ïarap ïa ki paidbah, ka Election Commission ka la plie lad ban pyndap ïa ka self-enumeration form lyngba ka website jong ka. Nalor kata, ki paidbah ki lah ban phone sha u Helpline 1950 jong ka tnad lane sha ki district helpline number 0364-2501255 bad 0364-2501228, lane ïakynduh ïa u BLO jong ki lada don kano kano ka jingeh.
Ha kaba kut, u DC u la ong ba ki bor pynïaid distrik ka la dep ban pynlong bun tylli ki jingïalang bad ki Rangbah Shnong bad ki nongïalam shnong ban pynshai ïa ka jingthmu jong kane ka jingjurip bad ban pynduna ïa ki jingsngew syier jong ki paidbah.
