Shillong, Jylliew 28: Ka Bharatiya Janata Party (BJP) Meghalaya kala pynpaw ka jingkyrmen ba skhem ba ha ka election 2028 hapoh ri lum Garo kan ioh MLA bad ha ki constituency kiba hap hapoh ka Shillong City kin kham ioh bun ki MLA.
Haba ïa kren bad u Mawphor u State President ka BJP Meghalaya u Rikman G Momin u la ong ba kum ka party ki don ka jingkyrmen ba skhem ba hapoh ri lum Garo ka party kan lah ban kham leh bha ha ka election 2028.
“Ngim lah ban ong beit thik katno ngin ioh hynrei kumba long mynta ha ri lum Garo ka don ka jingkyrmen ba skhem ba kan ioh MLA na ka party BJP namar ka jingtrei shitrhem bha ki nongtrei ka party” ong u Rikman.
Shuh shuh u la ong haba phai pat ha Khasi Hills bad khamtam eh ha ki constituency kiba hap hapoh ka nongbah Shillong ka party kan kham kiew ha ka jingioh ïa ki MLA bad kumjuh ruh ka West Shillong nalor ki constituency ba lah don MLA lypa.
“Kumba long mynta ka party ka phai khmat bha sha ka North Shillong bad ki katto katne tylli ki constituency kiba hap hapoh sor” ong u Rikman.
Shuh shuh haba khein kyllum lang u Rikman u la ong ba ha ka 2028 ka party kan ioh pat phew ki MLA.
