Nga la shah tyrwa 6 klur ban sangeh ka jingshah thngan halor ka VAB: Bah Adelbert Nongrum

Shillong, Jylliew 28: “Nga la shah tyrwa 6 klur ban pynsangeh noh ïa ka jingshah thngan na ka bynta ka jingïakhun jong ka jylla, khamtam ha kaba ïadei bad ka Village Administration Bills bad kiwei,” ong u MLA ka North Shillong Constituency u Bah Adelbert Nongrum ha ka 27 tarik, Jylliew, 2026 haba plie paidbah ïa ka community hall jong ka dorbar shnong Riatsamthiah ba la shna pynbha bad shna pynitynnat.
Ha ka jingplie ïa kane ka dorbar hall, la sakhi lang da u Rangbah Shnong ka Dorbar Shnong Riatsamthiah u Bah M. Kharkrang, u General Secretary u Bah Indra Sing Syiemlieh, ki dkhot ka Executive Committee, ki dkhot ka Seng Kynthei, ki dkhot ka Seng Samla, ki paidbah nongshong shnong bad u MDC Bah SP Kharjana.
Ka Dorbar Shnong, ha kane ka sngi, ka la pynkup burom ruh ïa ki longkmie jong ka shnong kiba la kynjoh ïa ka rta kaba la 80 snem shaneng bad ïa ki nongseng ïa ka Seng Kynthei Riatsamthiah.
Haba kren ha kane ka sngi na ka liang jong u MLA u la ong ba ka jingpynneh ïa ka riti ka skhem bad ka long ruh ka lawei ba phyrnai.
Lah ban ong ba kane ka Iing Dorbar ne ka community hall jong ka Riatsamthiah kaba la pynthymmai ka dei kaba la shna naduh u snem 2000 hynrei la lah ban pynthymmai ha kane ka sngi kaba la long ruh hadien ki 26 snem bad kane ka jingpynthmmai ka la long shisha kaba itynnad bad kaba shongkun shisha.
Ha kane ka sngi la donlang ki nongshong shnong ba kynthup naduh ki longkmie longkpa, ki samla bad ki hep kiba rit bad kumjuh ruh ki la don ki prokram bapher bapher.