Shilllong, Jylliew 28 : Ka mukotduma ba la mudui da u kyrtong ka VPP sha ka elekshon shiteng samoi ka Shillong Lok Sabha u Dr Batskhem Myrboh pyrshah ïa ka NEHU, yn sa shong bishar ha u bnai ban wan.
Kane ka long kat kum ka hukum ka Iing Bishar High Court ka jylla kaba la pynkynriah ïa ka sngi shong bishar ïa ka mukotduma sha ka 10 tarik Naitung.
U Justice HS Thangkhiew ula pynmih ïa ka hukum ha ka sngi Thohdieng, hadien ba u nongïasaid jong ka NEHU ula pyntip sha Iing Bishar ïa ki kam kiba mih haba ïadei bad ka jingïalang jong ka Executive Council ka University.
U Bah E Blah uba mihkhmat ïa ka NEHU, ula pyntip ba ka Executive Council ka la ïakynduh ha ka 25 tarik Jylliew 2026, hynrei ïa kane ka jingïalang la pynkynriah sha ka 7 tarik Naitung, 2026.
Haba shim ïa kane ka jingpyntip, ka Iing Bishar kala bthah ban buh ïa kane ka kam ban shong bishar biang ha ka 10 tarik Naitung, 2026.
