Shillong, Jylliew 28: Na ka dewshrah sha ka jaka jngohkai kaba itynnad kylla ka jaka kaba don 27 akar ha Shnong Mawrah ha kaba da ki spah ngut ha ka shisngi ki briew na kylleng ki poi ïaid kai pyngad.
Ban khring shuh shuh ïa ki nongwan jngohkai ka Meghalayan Age Limited kaba dei ka kompeni jong ka sorkar jylla ban kyntiew ïa ki kam jngohkai pyrthei harud jong ka pung ha Mawrah kala shna ïa ka restaurant kaba nyngkong ha Meghalaya da ki iit.
Ka jingshna ïa kane ka restaurant ka la dep ban shna bad mynta ka jingpynkhreh ban shna sa ïa ka jaka shet kaba itynnad tang khyndiat phut na ka restaurant kaba la shna ban long ka jaka bam ïa ki nongleit nongwan.
La ong ba kane ka jaka ka don ki krem dewïong ka la long ka jaka shrah hadien ba la khang tih dewïong ha u snem 2014, da ka jingtrei shitom ka tnad Soil Conservation ïa kane ka jaka shrah ka pynkylla mynta sha ka jaka kamai ki paidbah nongshnong ka shnong Mawrah.
