Ha u 2027 buhthong ban pyndep ïa ka Ropeway bad yn shimkhia ban ïohkam ki samla trai: Bah Sanbor

Shillong, Jylliew 28 : Ka jingtrei na ka bynta ka Ropeway Project hangne ha nongbah Shillong kaba 150 klur tyngka ka la ïaid shaid shaid bad la kyrmen ban pyndep ïa kane ka projek ha u 2027, ong u Myntri Sorkar bad MLA ka South Shillong u bah Sanbor Shullai ha ka Sngi Saitjain.
Une u Myntri u la ïoh ka jingïarap pisa na ka sorkar pdeng halor kane ka projek namar ka hap haph ka Constituency jongu lyngba ka Pragati Prabhagat Path Yatra kaba dei ka jingshim khia halor ka jingdap 12 snem ka sorkar ba la ïalam da u Modi.
U bah Sanbor u la ong ba ki barikor jong ka kompani KEC-TLC bad jongka tnad Tourism ki la batai ïa u ba ka jingtrei ka la ïaid shaid shaid bad kane kan pynïasoh ïa ka Shillong View Point bad ka madan Laban.
Hooid wat la ïa ka kontrak la ïasoi ban pyndep hapoh ka lai snem hynrei kane ka kompani ka la kular ban pyndep noh ha u snem ban wan ong u bah Sanbor.
Kane ka projek ka la sahteng da ki bnai lynter namar ba ka don ka mukotduma PIL ha ka iing bishar High Court jongka jylla.
U bah Sanbor ul a ong ba ïa kane ka PIL la ujor da ki riew shim kabu la pynwai noh da ka iing bishar bad ka la pynksan ïa ka tnad Tourism. La dep ïoh jingbit ruh halor kane ka projek na ka tnad Environment jognka sorkar pdeng, Forest and Climate Change.
Halor ka jingsiew bai jaka puta u la ïathuh ba la mang 3 klur tyngka na ka bynta ka Raid Laban Dorbar namar ka dei ma ka kaba la ai ïa kane ka jaka ban tei ïa kane ka projek. Na katei 1.50 klur tyngka la dep ban pyllait.
U la ong tang shu dep bad tang shu pynïaid ïa kane ka Ropeway kan kyntiew bha ïa ka kam jngohkai bad kan aikam aijam ïa ki samla trai shnong namar yn buh shwa ïa ki hakhmat ha kaba ïadei bad ka jingai ïa ki dukan bapher bapher.