Kyntu ki paitbah ïa ka sorkar ban phah moramot noh kloi ïa ka surok Kynshi -Lawbyrtun

Nongstoiñ, Jylliew 28: Ka surok na Kynshi bangla kaba pynïasoh bad ka surok Nongshilong _ Mawkyrwat ha ka shnong Parïong Eastern West Khasi hills district ka dei ka surok kaba don kam haduh katta katta namar ki paitbah nong shong shnong na katei ka thaiñ naduh Peiñlang, Rngisawlia, Parïong, Nongdom, Nonglait, Rangikseh, Lawrynjam, Mawkyllei Lawbyrtun bad bun kiwei kiwei kiwei ki shnong kiba hap ha Eastern West Khasi hills ki ïaid lyngba katei ka surok haba ki leit donkam ha Mairang kab adei ka head quater jong ka district.
Ha ka jingleit peit jong u nongthohkhubor jong u Mawphor ïka jinglong jingman jongkatei ka thaiñ la lap ba ka surok naduh Kynshi bangle haduh Lawbyrtun ka la sdang ban pra bad ban jot baroh shilynter.
Halor ka jingjot jongkatei ka surok la ïoh ban ïakren bad shibun ki nongñiah kali kamai, ki nongleit ong wan bad ki nongshong shnong na kitei ki thaiñ ha kaba ki la ong ba lada ka sorkar kam phah moramot noh kloi ïa katei ka surok kan buh ïa ki paitbah nongleit nognwan ha ka jingeh haba ki leit jingleit.
Ki la ong ruh ba lajan man la ka sngi ki paitbah ki don ki kam ha ki ophis sorkar ha Mairang ki hap ban ïaid na katei ka surok namar ban hiar sha Parïong bad phai shaduh Nonsgshilong ka la jngai than katba lada ïaid na katei ka surok pat ka kham jan bad kan nym shim por slem ban poi sha Mairang.
Ki paitbah katei ka thaiñ ki la ong ruh ba ka don ka ïew ha ka shnong Kynshi kaba ju long shisien shi taïew bad ki hap ban leit thied leit pet, leit siew leit tda na katei ka ïew kumta lada ka tei ka surok ka la sniew kin shem shitom ha ka leit ka wan namar lada sniew ka surok ki nongñiah kali ki hap ban pynkiew ïa ka bai leit bai wan.
Nalor kata la la lap ruh ba ha katei ka surok ka don kawei ka jingkieng rit kaba siang da ki dieng bad kaba la sdang ban pra bad ki dieng ba siang ki la sdang ban dkut kaba la buh jingma ïa ki kali ba lada jia ba ki dieng ba siang ïa katei ka jingkieng ki dkut ha ka por ba ïaid ki kali ba kit ïa ki nongleit nong wan ka lah ban wanrah ïa ka jingmynsaw lane ka jingjia ba sngew sih.
Kumta ki la kyntu jur ïa ka sorkar ba kan phah moramot noh kloi katba lah ïa katei ka surok khmatam eh ïa katei ka jingkieng khnang ba ki paitbah katei ka thaiñ kin lait na ki jingeh ha ka leit ka wan bad ka kit ka bah.
Nalor kata ki la ong ruh ba ka Eatern West Khasi hills ka dei ka district kaba dang thymmai kumta ka sorkar ka la dei ban kham phai khmat kyrpang na ban pynïoh ïa ki kam pynroi kum ki surok kiba bha, ki skul, ki madan ïalehkai, ki jaka sumar, ka rep ka riang bad kiwei kiwei khnag ba ka district kan kynjoh kumba long lem kiwei pat ki district hapoh ka jylla.