Mairang, Jylliew 28: Ka Deputy Commissioner, Eastern West Khasi Hills District ka la pyntip paidbah ba ka sorkar India ka khot ban thep kyrteng na ka bynta ka Subhash Chandra Bose Aapda Prabandhan Puraskar Award. Kane ka khusnam la ju leh man la u snem ha ka 23 tarik Kyllalynkot kum ka dak ban kynmaw burom ïa ka lyngkhuh sngi kha jong u riewkhraw ka ri u Netaji Subhash Chandra Bose.
Kane ka khusnam la ju ai kyrpang ïa ki riew shimet ne ki kynhun kiba don bynta ha ka jingnoh synñiang lyngba ki jinghikai bad jingïarap kiba long kyrkieh sha ki paidbah, ha ka por ka jingjia wan lynshop jong ki bor ka mariang bad kiwei kiba kynthup naduh ka jingpynkhreh lypa, ka jingpyllait im, ki lad jingïarap, ki jaka ai jingsumar shipor, ka jingwad bad kiwei kiwei.
Ïa kane ka khusnam award la bhah ha ki ar bynta, kawei na ka bynta ki riew shimet kaba kynthup ïa ka scroll bad medal. Katba kawei pat na ka bynta ki kynhun ne ki institution kaba kynthup ïa ka scroll bad ka plaque. Ka jingthep kyrteng na ka bynta kane ka khusnam kan long baroh shisnem lyngba ka National Awards Portal.
Namarkata, kino kino kiba la ibit ban ïoh ïa kane ka khusnam la ki dei ki riew shimet, ki nongtrei ba kham hakhmat, ki nongïalam shnong, bad kiwei kiba noh synñiang ban ïarap ïa ki paidbah ha ki por ba long kyrkieh, ki lah ban aplai na ka bynta kane ka khusnam.
