Jowai, Jylliew 27: Ka District Legal Services Authority (DLSA), West Jaiñtia Hills District, ka la plie ïa ka Legal Care and Support Centre haka Shnong Mupyut kaba hap hapoh ka Amlarem Sub-Division ha kane ka sngi Thohdieng shi bynta pynsuk ïa ka rukom ai jingshakri sha ki paidbah.
Ïa kane ka Legal Care and Support Centre la plie paidbah da u Shri N. A. Khan uba dei u District & Sessions Judge-cum-Chairman, District Legal Services Authority, West Jaiñtia Hills District, ha ka jingïadon lang ka kong V. Kezo kaba dei ka Sub-Divisional Officer (Civil), Amlarem, u K. M. Sangma, SDPO, Amlarem, ma Riwan Hinge, President, Jaiñtia Hills District Bar Association, ki nongtrei ka koit ka khaih bad ki ophisar na ki tnad treikam bapher bapher bad ki nongshong shnong ka thaiñ.
Haba ai jingkren u N. A. Khan ula ong kane ka Legal Care and Support Centre kan long kum ka jingpynïasoh kaba kongsan hapdeng ki nongshong shnong bad ki jaka treikam kum ki ïingbishar, ki pulit bad ki tnad sorkar. Ula pynshlur ïa ki nongshong shnong ban pyndonkam pura ïa kane ka jaka bad pynthikna ba ka District Legal Services Authority kan buddien beit ïa ka jingtreikam ban pynthikna ba ka hok bad ki jingshakri paidbah kin long na ka bynta ki paidbah ka Shnong. U la ai khublei ruh ïa u nongïalam shnong kiba don ka jingïohi jngai bad ka jingshimkhia na ka bynta ka bha ka miat jong ka imlang sahlang.
La pynkut ïa ka prokram da jingkren ai khublei naka kong D. G. Kharshiing, Chief Judicial Magistrate-cum-Secretary, District Legal Services Authority, West Jaiñtia Hills District.
