Dawa ka Congress ban hiar shuki u Myntri ka Pule Puthi bad kitkhlieh ïa ka kynrum kynram

SHILLONG, Jylliew 26: Ka Meghalaya Pradesh Congress Committee (MPCC) ha ka sngi Palei ka la dawa ban hiar shuki noh ïa u Union Education Minister jong ka sorkar pdeng, da kaba shim ïa ka jingkitkhlieh ïa ka Centre na ka bynta ki kynrum kynram eksamin ba ju jia man ka por bad kaei kaba ka la batai kum ka jingtlot suki suki jong ka rukom hikai paidbah jong ka ri.
Ïa kane ka jingdawa la pynpaw ha ka jingialang bad ki nongthoh khubor ba la pynlong hapoh ka jingialap Shiksha Nyay jong ka seng ha baroh kawei ka ri.Secretary ka MPCC u Manuel Badwar u la ong ba ka jingkynnoh lait tuh ki jingkylli ha ka eksamin NEET ka dei tang kawei ka nuksa jong ki mat kiba kham heh kiba ktah ïa ki samla pule bad ki jaka pule ha kylleng ka ri India.
Katkum u Bah Badwar, ka Sorkar Pdeng ka la hap ha ka jingai jingmut jong ka National Education Policy ban mang 6 percent na ka GDP jong ka ri sha ka National Education Policy. U la kynnoh ba ka jingpynlut jong ka sorkar ha kane ka bynta ka dang sah hapoh ka thong ba la buh bad u la kdew sha kaei kaba u la batai kum ka jingpynhiar ia ka jingkyrshan mang tyngka ia ka Ministry of Education, higher education institutions, ka University Grants Commission (UGC), bad katto katne ki prokram pule ba kongsan.
U Nongïalam ka Congress u la kynnoh ba ka jingpynhiar pisa na ka bynta ki skhim kum ka PM POSHAN, PM SHRI, Samagra Shiksha, PM-USHA bad ki jingïarap bapher bapher ïa ki khynnah skul ka la ktah jur ïa ki skul bad ïa ki khynnah skul kiba duk kiba shaniah ha ka jingkyrshan jong ka sorkar.
Ka party ka la pynpaw ruh ïa ka jingeh jong ki kam hikai kiba lait ha kylleng ka ri. Haba ïadei bad ki jingkheiñ ba la wanrah ha Parliament, u Badwar u la ong ba palat 8.46 lak tylli ki kam hikai ki dang sah thylli khlem pyndap, ka jinglong kaba u la kynthoh ka la ktah ïa ka jinglong jingman jong ka pule puthi bad ka jingpule jong ki samla pule.
Haba buh jingkylli ïa ka bynta jong ka National Testing Agency (NTA), ka Congress ka la kynnoh ba ka centralisation of entrance examinations ka la pyntlot ïa ka jingkitkhlieh.Ka party ka la kynnoh shuh shuh ïa ka Centre ba ka pynïadei ïa ka jingpyllait pisa na ka bynta ka pule puthi bad ka jingbud ryntih ïa ki polisi da ki jylla, da kaba kynnoh ba kum kine ki rukom leh ki pynduhjait ïa ki nongrim jong ka synshar paidbah.
Napdeng ki jingdawa ba kongsan jong ka, ka Congress ka la dawa ban don ka ïa ka jingtohkit ba la buh da por halor ki jingjia lait tuh ki jingkylli eksamin ha ka NEET bad ka jingbym lah jong ka NTA 2024-2026, ka jingpynpaw paidbah ïa ki jingai jingmut jong ka Radhakrishnan Committee, bad ka jingpynkylla pura ïa ka NTA lane ban thaw ïa ka kynhun eksamin ba thymmai kaba shai bad kaba don jingkitkhlieh.
Ka party ka la dawa ruh ban thungkam mardor ïa ki kam hikai kiba lait bad kyntu ruh ïa ka Parliament ban pynlong ïa ka jingïakren kaba bniah halor ki jingpynkylla ïa ka national examination system.
Nalor kata, ka Congress ka la ong ba ki samla pule kiba shah ktah ka kynrum kynram kiba ïadei bad ki eksamin ki dei ban ïoh ïa ka jingkyrshan kaba biang, da kaba kdew ba ki jingpynthut kiba ju jia man ka por ki la wanrah ïa ka jingbym thikna bad jingeh hapdeng ki nongïalehkai kiba pynkhreh na ka bynta ki eksamin ba ïakhun.