Ka kynrum kynram jong ka NEET-UG 2026, kam dei shuh ka ‘jingpang hynrei ka dei ki dak ki shin’ : Congress

Shillong, Jylliew 25: U Chairman In-charge Social Media jong ka Meghalaya Pradesh Congress Committee (MPCC) u Bah Langkupar War u la ong ba ka jylla ka kit ïa ka jingkit kaba khia jong ka jingeh ha ka pule puthi jong ka ri India, ha kaba ka jingbymlah jong ka ri ha ki eksamin bad ka jingai pisa ka la ktah ïa ki samla pule hangne “ka jinglut kaba kham bun, ka jingleit jingwan kaba kham bun, ka jingshaniah kaba kham bun ha ka jingkyrshan hi la ot noh”.
“4,164 ngut ki samla pule na Meghalaya ki la ïaleh biang ïa ka NEET ha kylleng ki 14 tylli ki centre. Ka jylla ka shaniah ha ka Samagra Shiksha ha ka jingkheiñ kaba 90:10 bad ka don napdeng ki jaka ba duna tam ka jingïoh ïa ki skul-computer ha India.Ki jingbymlah jong ka ri ki kala ktah jur hangne,” ong u War haba khot ïa ka kynrum kynram jong ka NEET-UG 2026 kum ka “dak, ym ka jingpang” ne (Symptom, not the disease).
U la kynthoh ba ka jingpynsangeh bad pynlong biang ïa ka NEET-UG 2026 ha ka 21 tarik u Jylliew ha ki 5,440 tylli ki centre na ka bynta palat 22 lak ngut ki samla pule ka la pynpaw paidbah ïa ka jingdkoh jong ka system.
“Ka NEET ka rai mano ban long doktor; haba ka khyrdop jong ka ka shah pynthut, ka jingshaniah ha ka rukom treikam baroh kawei ka shah pynkhih,” ong u War, da kaba kdew ïa ki khubor jong ka Reuters ba palat ar million ngut ki ba la pynkhreh ban ïakhun ki la mad ïa ka jingeh kaba khraw haba ïakhun ban ïoh ïa ki shuki ha ka jingjop kaba 5-6%.U nongïalam ka MPCC u la buh thong ïa ka jingtreikam jong ka National Testing Agency, da kaba ong ba ka jingshaniah ka la hiar.
“Ka NTA ka la kular ‘ban pynpoi khlem jingbakla’. Ha ka jaka jong kata ngi la ïoh ïa ka jingmih khubor jong ka NEET-UG 2024 kaba ka Supreme Court ka la ong ba ‘kam don jingïakynad’ bad kumba 155 ngut ki nongïoh jingmyntoi kiba la suba, ka UGC-NET 2024 ka la weng noh, ka CUET-UG 2026 ka la pynkylla por biang, bad ka UGC NET 2026 ka la pynlong biang” u la ong.
U la kdew ïa ka jingpeit bniah jong ka ïingbishar ba ha khlieh duh jong u bnai Jymmang 2026 ba ka tnad “kam pat thngat,” bad u la kdew sha ki khubor jong ki lad pathai khubor shaphang ki jingshah kem jong ka CBI kiba kynthup ïa ki riew shemphang ha ka sobjek ba la thung da ka NTA.U War u la ong ba ka aiñ kam shym la pynkylla sha ka jingbha.
“Ka sorkar ka la mynjur ïa ka Public Examinations (Prevention of Unfair Means) Act ha u bnai Jylliew 2024 da kaba kular ban pynkut noh ïa ka jinglait tuh.Ka jinglait tuh ki jingkylli ha u snem 2026 ka dang jia.Ka ain kam dei ka jingpynkylla lada ka eksamin architecture ka dang tlot”, u la ong.
“Ha u snem mang tyngka 2024-25, ka Kerala, Tamil Nadu bad West Bengal kim shym la ïoh ïa ka pisa Samagra Shiksha hapdeng ka jingïasoi MoU hapdeng u PM-SHRI.Ïa ka pisa ba la thmu na ka bynta ki khynnah skul sorkar la pyndonkam kum ka lever” ong u Bah War.
Da kaba kdew ïa ki jingkheiñ jong ka Rajya Sabha kiba pyni ba ki don 8,46,647 tylli ki kam hikai kiba lait ha u snem 2023-24 bad ka kynhun jong ka Parliament kaba maham ba ka jingduna ka long jan sha ka 10 lak, u Bah War u la ong “ki kam kiba thylli ki mut ki klas kiba kham heh, ka jinghikai ba bun kyrdan, ka jingduna ha ka jingpule bad ka jingsangeh skul kaba kham bun, kaba sniew tam ha ki skul nongkyndong bad ki riewlum”.
Ka NEET kaba pynshong nongrim ha ka kor kompiwtor kaba la thmu naduh u snem 2027, u Bah War u la kdew sha ka jingkhein jong ka UDISE+ 2024-25 kaba pyni ba 64.7% ki skul ki don kompiwtor bad 63.5% ki don internet ha ka ri baroh kawei, katba ka Meghalaya ka sahdien haduh kumba 19.7%.