Shillong, Jylliew 25: U Myntri jong ka tnat Pule puthi jong ka sorkar Jylla u Bah Lahkmen Rymbui ha ka sngi Palei u la plie ïa ka National Level Tribal Meet of Scouts, Guides, Rovers and Rangers hapoh ka prokram kaba la pynlong ha Meghalaya State Bharat Scouts and Guides Headquarters ha Shillong.
Ïa kane ka prokram kaba 5 sngi kaba la pynlong na ka bynta ban ïasam ïa ki kolshor, ki kam shakri ha ki kam jong ka jait bynriew bad kiwei kiwei pat ki kam jong ki riewlum ha kylleng jong ka ri baroh kawei.
Lyngba ki prokram bapher bapher ki nongïashim bynta kin lah ban ïoh ki lad ban mad ïa ki jingmut kiwei pat ki kam ha kaba ïadei bad ki kam kiba donkam ïa ki jingtyngkai, ki kam shakri, ka jingïalong shipara bad kiwei kiwei.
Ha kane ka prokram plie la shim bynta lang da Assistant Director (Region and State) u M. Sharma, ki ophisar, ki nongtrei jong ka Meghalaya State Bharat Scouts and Guides, bad ki nongiashim bynta na jylla Rajasthan, Tripura, Arunachal Pradesh, Chhattisgarh, Meghalaya bad ka North Frontier Railway (Assam).
Ki la don kumba 176 ngut tam kiba la wan ban shim bynta bad kumjuh ruh ki ban dang shim bynta ha kine ki 5 sngi ban dang pynlong ïa kane ka jingïakynduhlang.
Halor kane ka prokram na ka liang u Myntri ka tnat Education u Bah Lahkmen Rymbui u la ïaroh ïa ka jingwan ban ïashim bynta jong ki dkhot ha kane ka jingïalang. U la pynpaw ruh ïa ki jingnoh synniang jong ki riewlum hapoh ka ri baroh kawei la ka long ha ka roi ka san bad kiwei.
Haba banjur ïa ka jingdonkam ban ïalong kawei, u Bah Rymbui u la ong ba ka jingkhlaiñ jong ka bor ka shong ha ka jingïalong shipara bad jingïalong paralok.
Ha kane ka sngi la don bun ki prokram kiba pyni ïa ka jingriewspah jong ka kolshor, ka tem ka put bad kiwei kiwei.
