Ha ka jingïathir ka RBI halor ka MSME ïashimbynta kumba 150 ngut ki nongsengkam lajong

Shillong, Jylliew 25: Kum shi bynta ki prokram ba la pynlong baroh shi taïew ban pyndon burom ïa ka International MSME Day, kaba ju rakhe man la u snem ha ka 27 tarik u Jylliew, ka Reserve Bank of India (RBI), Shillong, ka la pynlong ïa ka Awareness Camp na ka bynta ki nongseng kam MSME ha State Convention Centre, Shillong, kaba la long ha ka sngi Palei.
Kumba 150 ngut ki nongseng kam seng jam kiba la don lypa bad kiba kwah ban seng kam seng jam na kylleng ka jylla Meghalaya ki la ïashim bynta ha kane ka prokram.
Ïa kane ka prokram la plie da u Bah Olden Nongpluh, General Manager (Officer-in-Charge), RBI Shillong. U Bah Moon Lander Wanshnong, Director, Tnad Commerce and Industries, Sorkar Meghalaya, u la ïadonlang kum u kongsan.
Ki heh ophisar na ka tnad Commerce & Industries Centre (DCIC), NABARD, SIDBI, MSME Development & Facilitation Office (MSME-DFO), Meghalaya Rural Bank, State Bank of India, HDFC Bank, Canara Bank bad kiwei kiwei ki jaka treikam kiba don bynta ha kane ka kam ki la ïadonlang.
Haba pdiang sngewbha ïa ki nongïashim bynta, u Deputy General Manager, ka RBI, u la kren shaphang ka jingdonkam ban wanrah ïa ka jingsngewthuh kaba kham bha hapdeng ki nongseng kam ha kaba ïadei bad ki lad jingïarap pisa bad ki lad pynroi bapher bapher kiba don na ka bynta ka kam MSME.
U la batai ïa ki sienjam ba kongsan jong ka RBI kiba thmu ban pynkhlaiñ ïa ka jingai ram ïa ki MSME, kynthup ïa ki thong Priority Sector Lending, ka Trade Receivables Discounting System (TReDS), Unified Lending Interface bad ki sienjam kiba kyntiew ïa ka jingpynskhem bad ka jingïoh ram ha ka por kaba biang.
Shuh shuh u la pynshlur ïa ki nongseng kam seng jam ban pdiang ia ka rukom siew digital, ban pynneh ïa ka jinglong ryntih ha kaba ïadei bad ka kam shim ram bad ban pdiang ïa ki rukom buh jingtip digital.
Haba ai jingkren ha kane ka jingïalang, u Bah Olden Nongpluh u la ban jur ïa ka bynta kaba kongsan ba ki MSME ki don ha kaba kyntiew ïa ka ïoh ka kot, ban pynmih ïa ki lad ïoh kam bad ban kyntiew ïa ka jingseng kam seng jam.
Haba batai ïa ki MSME kum ki “jaka sumar ïa ka jingseng kam seng jam”, u la kyntu ïa ki samla nongseng kam seng jam ban pdiang ïa ka jingsaiñdur thymmai bad ban noh synñiang sha ka jingkiew ka ïoh ka kot jong ka Meghalaya.
Shuh shuh u la ban biang ïa ka jingkut jingmut jong ka RBI ban pynsuk ïa ka jingïoh ram kaba la buh ryntih lyngba ka jingïatreilang kaba jan bad ka Tnad MSME, ki Sorkar Jylla bad Sorkar Pdeng, ki jaka ai ram bad ki nongpeit ïa ka kam.
U la ban jur ruh ïa ki sienjam ba dang shen kum ka jingkyntiew ïa ki pud jong ki ram ba lah ban ïoh khlem jingbuh bynda haduh T.20 lak, ka jingpyllait ïa ka jingsiew lypa ïa ki ram MSME kiba lah ban ïoh ïa kane bad ki lad ban pynsted ïa ki jingpyllait ïa ka pisa ba la shim kum ka ram.
Ha ka jingai jingkren jong u, u Bah Moon Lander Wanshnong u la ban jur ïa ki sienjam jong ka Sorkar Jylla ban kyntiew ïa ka jingseng kam seng jam lyngba ka jingkyrshan ha ka por ba dang sdang ïa ka kam, ka jingpynïasoh bad ki ïew ki hat, ki sienjam ban kyntiew ïa ki sap, ki jaka pynsuk bad ki skhim ai jingkyrshan bapher bapher na ka bynta ki MSME.
Haba ban jur ïa ka jingdonkam ban ai ram ha ka por kaba biang bad kaba jem dor, u la ong ba ki MSME kidei ki bor ba kongsan jong ka jingkylla ha ka imlang sahlang bad ka ïoh ka kot jong ka Meghalaya.
U la ïaroh ïa ka sienjam jong ka RBI ban pynïasoh lang ïa ki nongshim bynta ha ka kawei ka rynsan ban kyrshan ïa ka kam seng kam seng jam jong ka Jylla.
Ha kane ka prokram la don ruh ki jingïalang ïamir ïathir jingmut da ki ophisar na ka RBI, DCIC, MSME-DFO, SIDBI, NABARD bad ki bank kiba ïashim bynta halor ki sienjamjong ka RBI, ki skhim jong ka Sorkar Pdeng bad Sorkar Jylla, ki jingai jingshakri jong ki bank, ki kyndon ban ïoh ïa ka jingïarap bad ka jingkyrshan jong ki jaka treikam ïa ki MSME.
Ki nongseng kam seng jam kiba la ïoh ïa ka jingjop ki la ïasam ruh ïa ki jingshem bad ki jingsngewthuh jong ki halor ka jingpynkhreh ïa ka rukom trei kam, ka jingpynheh bad ka jingpynïasoh bad ki ïew ki hat, kaba ai mynsiem ïa ki briew kiba kwah ban seng kam seng jam.
Ki nongïashim bynta ki la ai jingïaroh ïa ka sienjam bad ki la ïashim bynta shitrhem ha ki jingïamir jingmut ha ki jingïalang. Ka Awareness Camp ka la pynskhem biang ïa ka jingshimkhia lang jong ki nongshim bynta ban pynkhlaiñ ïa ka kam MSME, ban kyntiew ïa ka jingkynthup lang ïa baroh ha ka kam pisa tyngka bad ban pynshlur ïa ka jingseng kam seng jam ha Meghalaya.