Jowai, Jylliew 25: U Mayalang Pakem, uba dei u khun jong u Plan Lyngdoh bad ka Stillda Pakem na Mynthong, Jowai, ula ïoh ban khur haduh ar tylli ki takma ksiar ha ka lympung jingïakob pyni dohksah kaba la tip kum ka Mr. & Ms. East India Natural 2026, kaba la long ha Rangia Officer’s Colony Hall, Assam.
Kane ka rynsan jingïakob ka dei kawei na ki jingïakob bodybuilding bad fitness kiba heh tam ha India, kaba la tip kum ka Biggest Natural Bodybuilding and Fitness Championship Federation of India & South East Asia bad kaba la ïoh jingithuh ruh na ka NITI Aayog jong ka Sorkar Pdeng. Ha kane ka rynsan la wan ban shim bynta haduh 897 ngut ki nongïashim bynta na ki jylla bapher bapher jong ka ri India.
U Mayalang Pakem ula ju jop teng ha ki rynsan jingïakhun bodybuilding kiba heh hapoh ka ri India, kynthup haka Mr. & Ms. India Natural Men’s Physique bad ka Mr. & Ms. East India (Zonal Bodybuilding & Model Championship) kaba la long ha Guwahati ha u bnai Rymphang jong une u snem.
Ha kane ka jingïakob kaba la long haka 20 bad 21 tarik u Jylliew 2026 ha Rangia Officer’s Colony Hall, Assam, u Mayalang Pakem ula jop biang bad u la wanrah burom sa shisien ïa ka District bad kumjuh ruh ïa ka Jylla Meghalaya.
Ha ka 20 tarik u Jylliew, 2026 u la wan nyngkong haka jingïakob Mr. & Ms. East India Natural (Annual Zonal Title Championship on Natural Bodybuilding and Fitness) haka kyrdan Bodybuilding Up to 60 kg.
Ha ka 21 tarik u Jylliew 2026, ula ïoh biang ïa ka kyrdan kaba nyngkong ha ka No-Drug Fit Classic 2026 (Annual National Pro-Qualifier Championship on Natural Bodybuilding and Fitness) haka kyrdan Bodybuilding Up to 60 kg.
Nalor kine ki jingjop, u Mayalang Pakem ula ïoh ruh ïa ka Pro-Card na ka FIN (Fit India Natural) Bodybuilding & Fitness Federation, kaba la pynlong ïa u kum u Pro Athlete. Da kane ka jingïoh Pro-Card ula shah jied ban leit mihkhmat ïa ka ri India haki jingïakob International Level Bodybuilding Championship ki ban sa long shakhmat.
Kane ka jingïoh jingjop jong u Mayalang Pakem ka long ka jingïaroh kaba khraw ym tang ïa u shimet, hynrei ka long ruh ka jingsarong ïa ka thaiñ Ri lum Jaiñtia bad ïa ka Jylla Meghalaya hi baroh kawei. Ula pyni shisha ïa ka jinglah, jingïaleh shitom bad jingïaineh ha kane ka jingïalehkai bad u la long ka nuksa kaba bha tam ïa ki samla kiba don jingthmu ban lait na ki jing kyrni kiba sniew bad ki jingpang ki ba bun jait kaba ktah ha jing mut jing pyrkhat kum ka stress, anxiety, depression bad kiwei, ula kyntu ïa kiba don ka jingthmu ban poi sha ki kyrdan kiba kham shalor ha kane ka kam jingïalehkai Fitness.
Ula pynsngew kum u Athlete jong ka Meghalaya uba la leit represent bun sien ïa ka State, ula kyrpad ïa u Sport Minister bad ka Sorkar ba kin phai khmat ïa kum kane ka Sports ruh namar kane ka long kaba kongsan tam na ka bynta ka jingkoit jingkhiah jong ka met bad ka jingmut jingpyrkhat jong u Wei pa u Wei u briew.
