Nongpoh, Jylliew 24: Kum shibynta jong ki jingïalap paidbah ban ïakhun pyrshah ïa ka jingkyrni ha ki jingdih pynbuaid, ka ophis u District Sports Officer (DSO) Ri Bhoi District, ryngkat ka jingïatreilang bad ka ophis jong ka District Social Welfare Officer, Ri-Bhoi District da ka jingkyrshan lang ka Nasha Mukt Bharat Abhiyan, Ministry of Social Justice and Empowerment jong ka sorkar pdeng, hynne ka step ka la pynlong ïa ka Cycling Rally kaba jngai kumba 5 km, kaba la sdang na Saiden bad poi pynkut ha Nongpoh Town Shopping Complex ha Nongpoh.
Ha kane ka rally, bun ki samla na ka thaiñ Nongpoh ki la ïa shim bynta da kaba ñiah bicycle kum ka dak ka jingïatreilang ban pynsngewthuh ïa ki paidbah halor ki jingma na ka jingdih drok bad kiwei pat ki jingdih pynbuaid. Ha kane ka sngi naka liang u District Sports Officer ka Ri Bhoi, u Bah Bobby L. Nongbet, u la ïa snohkti lang bad ki samla ban shim bynta ha katei ka jingñiah bicycle.
Ïa ka rally la kaweh lama da ka Kong Ridashisha Lyndem, Senior Coach na ka Directorate of Sports and Youth Affairs, Meghalaya, kum ka dak jong ka jingsdang ïa kane ka prokram.
Hadien ba la pyndep ïa ka rally, la pynlong ïa ka jingïalang kaba lyngkot ha phyllaw jong ka Nongpoh Town Shopping Complex, ha kaba la batai sha ki paidbah halor ka jingthmu jong kane ka prokram bad ka jingdonkam ban wanrah ïa ka imlang sahlang kaba lait na ki jingdih pynbuaid.
U Deputy Commissioner ka Ri Bhoi, u Dr. Abhishek Saini, u la wan shim bynta kum u kongsan ha kane ka prokram ryngkat ka jingdonlang ruh ka Kong N.F. Sunn, District Social Welfare Officer, u J. Rabha, DSP Traffic Ri Bhoi, bad kiwei pat ki ophisar sorkar kiba la pynpaw ïa ka jingkyrshan jong ki ïa kane ka jingïalap paidbah pyrshah ïa u drok.
Ki nongkren ha kane ka sngi ki la kyntu ïa ki samla bad ki paidbah ba kin long kiba husiar bad ban kiar na kino kino ki jait jingdih ne jingbam kiba lah ban pynsniew ïa ka jingim bad ka lawei jong ki.
