Jam ka Shillong Commerce College sha u Mawmer ba 60, plie ka Dr Ampareen ïa ka jingrakhe

Shillong, Jylliew 24: Ka Shlem ai jinghikai ïa ki khun samla jong ka jylla bad ïa kiba nabar ruh kumjuh, ha ka jingïaid lynti ban pynphriang ïa ka jingnang jingstad mynta u snem ka Shillong Commerce College kala kynjoh ïa u mawmer ba 60 naduh ba la seng ïa ha u snem 1967.
Ha kane ka jingrakhe dap 60 snem ne ka Diamond Jubilee ka Dr. Mazel Ampareen Lyngdoh kaba dei ka MLA jong ka East Shillong, ka la long kum ka kongsan ha kaba kala kyntiew ïa ka lama jong ka College kum ka dak jong ka jingplie ïa ka jingrakhe ia ka jingdap 60 snem.
Haba kren kum ka kongsan ka Dr. Mazel Ampareen Lyngdoh kala ai ka jingïaroh ïa kane ka shlem ai jinghikai kaba la kynjoh sha u mawmer ba 60 ha ka jingiaid lynti jong ka ban ai ka jingshakri ïa ki khun samla jong ka jylla.
Ka Dr. Ampareen kala ong, “Ki sorkar ki leit ban ki wan hynrei ki jaka ai jinghikai ki ïai neh bad ki ïai bteng ban ai ka jingshakri bad ha kane ka sngi kadei ka por kaba biang ba halor ka jingdap 60 snem jong kane ka shlem ai jinghikai”.
“Ka jingstad ka ai ïa phi ïa ka jingtbit, ka jingstad ka ai ïa phi ïa ki atiar bad ka jingstad ka pynlong ïa phi kiba bitdor” ong ka Dr. Ampareen.
Na ka liang u Vice Principal uba dei ruh u head ka Commerce Department u BR Upadhya u la kren lyngkot shaphang ka history jong ka College naduh ka por bas dang nyngkong eh.
Ha kane ka sngi ki nongkren ki kynhtup ïa u Prof. Henry Lamin uba dei u President ka Governing Body, Dr. S Khongwir iba dei Principal bad ka Kong Aiona Kharmawphlang kaba dei Vice Primcipal jong ka College.
La nang pynphuh pynphieng ïa kane ka sngi kadei lyngba ka jingrwai bad ka jingshad jong ki samla pule jong kane ka College.