Da ka Bike Rally la pynlong ha EJHD ban pynsaphriang ïa ka khubor halor ka jingshyrkhei u drok

Khliehriat jylliew 24: Kum shibynta ka jingrakhe ïa ka sngi pyrshah drok lane ka International Day against Drug Abuse & Illicit Trafficking, ka ophis jong ka District Social Welfare Officer (DSWO), East Jaiñtia Hills District mynta ka sngi ka la pynlong da ka prokram ba kyrpang ka Bike Rally ha kaba ki motor bike lane ki ar shaka ki la sdang ïa ka rally na ophis u Deputy Commissioner sha Lad Sutnga ter ter shaduh Ladrymbai bad sha shnong Rymbai, kane ka prokram ka dei ruh hapoh ka Nasha Mukt Bharat Abhiyan.
Ïa kane ka jingiaid rally ki motor bike la plie ne pyllait da u Additional Deputy Commissioner, East Jaiñtia Hills District, u bah A Nongbri, MCS ha kaba la ïa don ryngkat lang ruh ka District Social Welfare Officer (DSWO), East Jaiñtia Hills District, ka kong R. Bareh, ka Programme Manager, Mihmyntdu Community Social Welfare Association (MCSWA), Khliehriat, ka kong R. Patlong bad kiwei kiwei.
Haba ai jingkren ha shwa ban sdang ka rally, u bah A.Nongbri u la ong ba kane ka bike rally ka long kum ka rynsan ban pynsaphriang ïa ka khubor sha ki paidbah nongshong shnong jong ka district, khamtam eh sha ki samla halor ka jingshyrkhei u drok bad ba ki paidbah kin tip ruh ïa ka Nasha Mukt Bharat Abhiyan kaba la pyllait myn ha ka 15 tarik u nailar 2020 kaba treikam na ka bynta ka bha ka miat ha ka imlang ka sahlang kaba pynkynmaw ruh ïa ki nongshong shnong ïa ka jinglaitluid kaba lait ym tang na ka jingsynshar kiwei hynrei kaba lait ruh na kiba bun jait ki jingsniew khamtam kaba lait na u drok.
U ADC, Nongbri, u la ong ruh ba ha ka jingiakhun pyrshah ïa u drok ka long kaba donkam bha ïa ka jingiatreilang, ka jingiashimbynta lang ba kynthup naduh ki tnat sorkar, ki kynhun seng bapher bapher,ki shlem ai jingnang jingstad, ki paidbah nongshong shnong ban wanrah ne pynlong ïa ka ri India kaba lait na u drok, u la bynrap ruh ba u drok u dei uwei na ki jingeh hapoh ka district watla ka tnat pulit bunsien ka ioh ban kurup ïa ki drok bad kem ïa kiba donkti hynrei kane ka jingeh ka dang iai don beit bad ka ktah ïa ka imlang ka sahlang, kumta ka long kaba donkam eh ban don ka jingiatreilang ban iakhun pyrshah ïa u drok “Kane ka Bike Rally ba pynlong mynta ka sngi kan long ka khubor sha baroh ki paidbah khamtam sha ki khun samla ba ki dei ban kiar na u drok” ong u bah Nongbri bad ong ruh ba kan sa don ka jaka sumar ïa ki dih drok ha East Jaiñtia Hills District bad kane kan ka jaka sumar ne ka Rehabilitation Centre kan iarap ïa kito kiba la kyrni ha u drok bad kan iarap ban tei biang ïa ka jingim jong kito kiba dih drok bad wanrah biang ïa ki sha ka imlang ka sahlang.
Shuh shuh, ha shwa ban sdang ïa Bike Rally, ka Programme Manager, Mihmyntdu Community Social Welfare Association (MCSWA), Khliehriat, ka kong R. Patlong ka la ialam ha kaba shim ïa ki kyntien jingkular lane ka pledge ha kaba la ïa shimbynta lang da ki heh sorkar lem bad baroh kiba la wan ban iashimbynta ha kane ka prokram bad kane ka jingshim jingkular ka pyni ïa ka jingshim khia lang jong baroh ha kaba iadei bad ka jingiakhun pyrshah ïa u drok ban pynlong ïa ka district kaba lait na u drok.